Зеленский Нью-Йоркда БМТ Бош ассамблеясида қатнашиши мумкин. Путинчи?

Украина Президенти Владимир Зеленский сентябрь ойида БМТ Бош ассамблеяси сессиясида иштирок этиш учун Нью-Йоркка бориши мумкин. Бу ҳақда манбаларга таяниб, “Bloomberg” хабар берди. 

Бирлашган Миллатлар Ташкилотининг 78-сессияси 5-сентябрь куни очилади ва унда президентлар, ҳукумат раҳбарлари ва ташқи ишлар вазирлари иштирок этади. 

Айтилишича, Зеленский Бош ассамблея доирасидаги бошқа учрашув ва йиғилишларда ҳам қатнашиш ниятида.

Манбага кўра, Украина раҳбари ўзининг 2022 йилнинг ноябрида G20 саммитида илк бор тақдим этган “тинчлик формуласи”ни илгари сурмоқчи. У ўн банддан иборат бўлиб, жумладан, радиация, ядро ва энергетика хавфсизлиги, барча маҳбусларни озод қилиш, Украина ҳудудий яхлитлигини тиклаш, Россия қўшинларини олиб чиқиб кетиш ва можарога чек қўйиш каби талабларни назарда тутади. 

Бироқ Россия бу формула асосидаги музокараларни истисно қилади. Мамлакат Ташқи ишлар вазирлигининг билдиришича, Москва сиёсий келишув имкониятини рад этмайди, аммо Киев шартлари бўйича гаплашмоқчи эмас.

Қайд этилишича, Украина расмийлари БМТ йиғилишида “тинчлик формуласини” муҳокама қилишни талаб қилмоқда, бироқ Киевнинг баъзи иттифоқчилари бунга қарши. Баъзилар “Глобал жануб” деб аталадиган кўплаб давлатлар Украина тинчлик режасини қўллаб-қувватлашга қўшилишини хоҳлайди. Улар БМТ Хавфсизлик Кенгашида Украинадаги тинчлик муҳокамасини муқобил вариант деб атамоқда.

Манбалар Россия Президенти Владимир Путиннинг БМТ Бош Ассамблеяси сессиясида иштирок этишини кутмаяпти, улар буни Халқаро жиноий суд томонидан ҳибсга олиш учун чиқарилган ордер билан боғламоқда. 

Кеча, 31 июль куни Кремль Путиннинг Нью-Йоркдаги БМТ Бош Ассамблеясида ҳозирча иштирок этиш режаси йўқлигини маълум қилган.