Зеленский “Дружба” қувури таъмирланганини эълон қилди

Украина Президенти Владимир Зеленский Европа билан келишувларнинг ўз зиммасидаги қисмини бажарганини ва “Дружба” нефть қувурининг шикастланган қисмини таъмирлаганини маълум қилди. Бу ҳақда у кеча, 21 апрель куни ўзининг Telegram-каналида ёзди.

“Нефть қувури фаолиятини қайта бошлаши мумкин. Ҳозирда ҳеч ким Россиянинг нефть қувури инфратузилмасига берадиган зарбалари такрорланмаслигига кафолат бера олмаса-да, мутахассисларимиз қувур тизими ва ускуналари ишини тиклаш учун базавий шароитларни таъминладилар.

Биз бу билан Европа Кенгаши томонидан аллақачон маъқулланган Украина учун Европа кўмак пакетининг блокдан чиқарилишини боғлаймиз. Шу билан бирга, ҳамкорлар Украина учун кластерлар бўйича ҳам тегишли қадамларни ташлайди деб умид қиламиз – биз биринчи кластерлар бўйича ишнинг ўз қисмимизни аллақачон бажардик”, деб ёзди Зеленский.

Бундан ташқари, Украина Президенти ушбу уруш учун Россияга нисбатан тизимли санкция босимини ва Европага энергия ташувчиларни етказиб беришни янада диверсификация қилиш ишларини давом эттириш кераклигини айтган. 

“Европа уни йўқ қилишга ёки заифлаштиришга уринаётганлардан мустақил бўлиши керак”, дейди Зеленский.

Эслатиб ўтамиз, аввалроқ Зеленский “Дружба” нефть қувури орқали нефть Россиядан Европага боришига қарамай, уни таъмирлашга ваъда берган эди.