Зеленский бир йил ишлаган Бош вазирни лавозимидан олди

Украина Президенти Владимир Зеленский бир йил аввал тайинланган Бош вазир Юлия Свириденкони алмаштиришни режалаштираётганини маълум қилди. Бу қарор амалда ҳукуматнинг истеъфосига сабаб бўлди. Бу ҳақда Зеленский X ижтимоий тармоғида ёзди.

Зеленский кеча, 12 июль куни Свириденко ўрнига кимни бош вазирликка таклиф қилиши ёки унинг ўзи қайси лавозимга ўтишини очиқламаган. Шу билан бирга, у ҳуқуқни муҳофаза қилувчи органлар раҳбарлари ўртасида ҳам ўзгаришлар бўлишини билдирган. Унинг сўзларига кўра, бу ўзгаришлар “янгиланган сиёсий стратегияни амалга оширишни таъминлаш” учун зарур, аммо бу стратегиянинг мазмуни ҳақида қўшимча маълумот берилмаган.

“Юлияга Бош вазир сифатидаги аниқ, барқарор ва самарали меҳнати, Украина жамоасидаги кўп йиллик хизматлари учун миннатдорлик билдираман. Мен унга асосий ҳамкорлардан бири билан муносабатларнинг янги ва муҳим йўналишига раҳбарлик қилишни таклиф қилдим”, деб ёзган Зеленский X ижтимоий тармоғида.

У, шунингдек, парламент депутатлари билан биргаликда ҳукумат таркибида тегишли ўзгаришларни амалга оширишни кутаётганини билдирган.

Зеленский ҳуқуқни муҳофаза қилувчи идоралар раҳбарларини алмаштириш сабабларини ҳам изоҳламаганг.

Украина қонунчилигига мувофиқ, Бош вазирнинг истеъфоси парламент томонидан тасдиқланиши керак. Бу эса бутун ҳукуматнинг истеъфога чиқишига олиб келади. Парламент депутатлари эҳтимолий номзодлар сифатида собиқ бош вазир, ҳозирги Энергетика вазири Денис Шмигаль, Мудофаа вазири Михаил Федоров ҳамда давлатнинг “Нафтогаз” компанияси раҳбари Сергей Корецкий номларини тилга олмоқда.

Оппозиция депутати Ярослав Железнякнинг айтишича, ҳозирча Сергей Корецкий янги Бош вазирликка энг кучли номзод ҳисобланади. Унинг фикрича, Юлия Свириденко эса АҚШдаги Украина элчиси этиб тайинланиши мумкин.

Маълумот учун, иқтисодчи Юлия Свириденко 2025 йил июль ойида Бош вазир этиб тайинланган эди. Бундан аввал у бир йил давомида Зеленский маъмурияти раҳбари ўринбосари, ундан олдин эса тўрт йил иқтисодий ривожланиш ва савдо бўйича Бош вазир ўринбосари лавозимида ишлаган.

Эслатиб ўтамиз, аввалроқ Киев шаҳар суди Владимир Зеленский идорасининг собиқ раҳбари Андрей Ермакни 140 миллион гривна (тахминан 3,1 миллион доллар) гаров эвазига озод қилиш имконияти билан 60 суткалик қамоқ жазосига ҳукм қилган эди. Украина Миллий коррупция бюроси ва Ихтисослаштирилган аксилкоррупция прокуратураси 11 май куни Андрей Ермакни Киев яқинидаги элита турар жой қурилиши орқали қарийб 10 миллион доллар пул ювиш жиноятига алоқадорликда гумон қилаётганини маълум қилганди. Кейинроқ Андрей Ермак учун талаб миқдоридаги гаров пули тўлиқ тўланиб, озод қилинган эди.