Зеленский АҚШ раҳбарлари ва америкаликларга 33 марта миннатдорлик билдирди – CNN

Кеча, 28 февраль куни бўлиб ўтган Овал офисидаги “жанговар” учрашуви чоғида Президент Дональд Трамп ҳам, вице-президент Жеймс Дэвид Вэнс ҳам Украина Президенти Владимир Зеленскийга етарлича миннатдор бўлиши кераклигини айтди. Ҳисоб-китобларга кўра, Зеленский шу пайтгача Оқ уй раҳбарлари ва Америка халқига 33 марта миннатдорлик билдирган. Бу ҳақда CNN хабар берди.

Кечаги учрашувда ҳам Украина раҳбарига миннатдор бўлиши лозимлиги кўп бора айтилди.

“Сиз миннатдор бўлишингиз керак. Сизда карталар йўқ, шунинг учун кўпроқ миннатдор бўлишингиз лозим”, деган Трамп Зеленскийга.

Оқ уй раҳбарининг сўзларига қўшимча қилган вице-президент Вэнс ҳам буни бир неча маротаба сўради ва Зеленскийнинг сўзларини “ҳурматсизлик” деб атади.

“Бутун учрашув давомида бир марта раҳмат айтдингизми?”, деб сўради Вэнс.

Трамп Зеленскийнинг ўзига нисбатан муносабатини назарда тутган бўлиши мумкин, худди Вэнсга ўхшаб. Аммо уларнинг Зеленский билан бўлган қизғин фикр алмашиши бутун дунё бўйлаб акс-садо бераётган бир пайтда, шуни таъкидлаш жоизки, Зеленский Россия 2022 йилнинг февралида кенг кўламли босқинни бошлаганидан бери АҚШга бир неча бор миннатдорлик билдирган – Трамп ва собиқ президент Жо Байденга, ҳар икки партиядан Конгресс аъзоларига, АҚШ мудофаа компаниялари ва уларнинг ходимларига ҳамда Америка халқига ташаккур айтган.

Ҳаттоки, Зеленский кечаги учрашувдан сўнг Оқ уйни тарк этгач, Х саҳифасида қуйидагича пост қолдирди:

“Раҳмат, Америка, қўллаб-қувватлаганингиз учун раҳмат. АҚШ Президенти Дональд Трампга, Конгрессга ва Америка халқига раҳмат. Украинага адолатли ва мустаҳкам тинчлик керак ва биз айнан шу мақсадда ҳаракат қилмоқдамиз”, дея ёзган Владимир Зеленский.

Қуйида Зеленскийнинг Қўшма Штатлар, унинг расмийлари ёки халқига кўрсатган ёрдами учун миннатдорлик билдирган 33 та ҳолатдан айримлари келтирилган.

2022 йил 21 январь:

“Украина учун мисли кўрилмаган Америка дипломатик ва ҳарбий ёрдами учун Жо Байденга раҳмат”, дея ёзган Х саҳифасида.

2022 йил 1 июль:

“Мен АҚШнинг янги хавфсизлик ёрдами пакетини, шу жумладан замонавий ҳаво мудофаа тизимларини тақдим этиш ҳақидаги тарихий қарорини олқишлайман. [Байден] Украинани қўллаб-қувватлаганингиз учун ташаккур. Ғалаба сари биргаликда!”, дея ёзади у.

2022 йил 19 август:

“Мен 775 миллион доллар миқдоридаги яна бир Америка ҳарбий ёрдам пакетини жуда қадрлайман. Ушбу қарор учун [Байден] сизга раҳмат! Биз душманни енгиш учун яна бир муҳим қадам ташладик. Украина озод бўлади!”, дейилади постда.

2022 йил 21 декабрь, Байден билан учрашув:

“Катта раҳмат, жаноб президент. Албатта, икки томонлама ёрдамга раҳмат. Конгрессга раҳмат. Бизнинг, адолатли, оддий халқимиздан сизнинг оддий халқингизга, америкаликларга раҳмат. Мен жуда миннатдорман”.

2022 йил 21 декабрь, АҚШ Конгрессига мурожаат:

“Ҳозир, ушбу махсус Рождество байрамида барчангизга раҳмат айтмоқчиман. Ўз уйидаги илиқликни қадрлайдиган ва бошқа одамларга ҳам худди шундай илиқликни тилайдиган ҳар бир америкалик оилага миннатдорлик билдираман. Мен президент Байденга ва иккала партияга, Сенат ва Вакиллар палатасидаги бебаҳо ёрдамингиз учун миннатдорлик билдираман. Бу йил Украинани қўллаб-қувватлаган, украиналикларимизни қабул қилган, давлат байроқларимизни ҳилпиратган, бизга, халқимизга ёрдам берган шаҳарларингиз ва фуқароларингизга миннатдорлик билдираман. Барчангизга, ҳозир олдинги сафда турган барчага, ғалабани кутаётган барчага раҳмат”.

2023 йил 21 сентябрь, Байден билан учрашув:

“Жаноб президент, сиз томонингиздан барча украиналикларга жуда илиқ ва кучли сўзлар айтилган. Раҳмат, қадрлайман, хурсандман. Таклифингиз учун ташаккур. Мунтазам мулоқотимиз мамлакатларимиз чинакам иттифоқчи ва стратегик дўст эканидан далолатдир. Биз АҚШ томонидан Украинага Россия босқинига қарши курашда кўрсатилаётган ҳаётий ёрдамни жуда қадрлаймиз”.