Юн Сок Ёлнинг иши прокуратурага топширилди

Жанубий Корея президенти Юн Сок Ёлга қарши давлат тўнтариши ва ваколатларни суиистеъмол қилиш бўйича иш юқори лавозимли амалдорларга оид Коррупцияга қарши тергов бошқармаси томонидан прокуратурага топширилди. Бу ҳақда “Yonhap” хабар берди.

Нашрга кўра, жорий йилнинг 15 январь куни юқори мартабали мансабдорларга қарши Коррупцияга қарши тергов бошқармаси президентни иккинчи уринишда ҳибсга олиб, сўроқ қилган. Бироқ Юн Сок Ёль тергов пайтида кўрсатма беришдан бош тортган. Шундан сўнг, бошқарма давлат раҳбарини бир неча бор яна сўроқ қилишга ҳаракат қилган, аммо 19 январь куни суд уни ҳибсда сақлаш тўғрисида қарор чиқарган.

Коррупцияга қарши бошқарма айблов қўйиш ваколатига эга эмас, лекин шубҳаларни ўрганиб, хулосалар беради. Шу асосда, тергов бошқармаси ўз хулосасида давлат тўнтариши ва ваколатларни суиистеъмол қилиш бўйича айбловлар қўйишни прокуратурадан сўраган. Президент Юн Сок Ёлнинг адвокатлари бу органнинг давлат тўнтариши билан боғлиқ ишларни тергов қилиш ваколатига эга эмаслигини таъкидлаган.

Нашрнинг ёзишича, президентнинг иши прокуратурага топширилиши кутилаётганди, лекин бу жараён бироз кейинроқ амалга оширилиши керак эди. Жорий йилнинг 19 январида президент ҳибсга олинганидан сўнг, тергов бошқармаси тахминан 10 кун давомида ишни ўрганишни режалаштирганди.

Эслатиб ўтамиз, аввалроқ ҳибсга олинган Юн Сок Ёль суднинг расмий ҳибсга олиш қароридан сўнг Сеулдаги ҳибсхонанинг 12 квадрат метрли якка тартибдаги камерасига жойлаштирилгани хабар қилинганди. Маълумотларга кўра, президент жойлашган камера одатда беш ёки олти кишини сиғдира олади. Корея Жазони ижро этиш хизмати бош комиссари Шин Ён Хе Юн Сок Ёль ҳибсга олиш жараёнида барча расмий тартиб-қоидаларга, жумладан, суратга тушиш ва тиббий кўрикдан ўтишга риоя қилганини тасдиқлади. Шу билан бирга, президент хавфсизлигини таъминлаш мақсадида унинг ишини алоҳида ходим назорат қилаётгани қайд этилди.

Юн Сок Ёль иши 

Ўтган йилнинг 3 декабрь куни кечқурун Юн Сок Ёль Жанубий Кореяда ҳарбий ҳолат эълон қилган эди. Аммо бу ҳолат тахминан олти соатдан кейин бекор қилинди. Шундан сўнг, 14 декабрь куни Юн Сок Ёлга нисбатан импичмент эълон қилинди. Оқибатда унинг ваколатлари тўхтатилди.

Бирлашган тергов гуруҳи 14 декабрь куни парламентда импичмент эълон қилинганидан кейин ваколатлари тўхтатилган Жанубий Корея президенти Юн Сок Ёлни ҳибсга олишга ордер бериш учун Сеул судига мурожаат қилганди. Жанубий Корея суди терговчиларнинг илтимосини қаноатлантириб, Юн Сок Ёлни ҳибсга олишга ордер берди. Ордерга эга терговчилар 3 январь куни мамлакат тарихида биринчи марта президент қароргоҳига уни ҳибсга олиш мақсадида етиб борган,  аммо терговчилар Юн Сок Ёлни ҳибсга олиш бўйича бўлган беш соатлик қарама-қаршиликдан сўнг унга қарши ордер ижросини тўхтатишга қарор қилган. 7 январь куни Жанубий Корея суди мамлакат президенти Юн Сок Ёлни ҳибсга олиш учун яна ордер берди. 15 январь куни ҳуқуқ-тартибот идоралари Жанубий Корея президентини фитна иши бўйича ҳибсга олди.