Йўл эмас, сувдаги “пробка”. Европа портларида кемалар тирбандлиги вужудга келди

Европа портлари пандемиядан бери кузатилмаган энг катта юк тирбандлиги билан тўқнаш келмоқда. Бу ҳақда “Financial Times” хабар берди.

Логистика ва кема ташув компанияларининг огоҳлантиришича, дарё кемалари товар юклаш учун бир неча кунлаб кутишга мажбур бўлмоқда. Контейнер ташувчи кемалар эса кечикишларга дуч келмоқда. Энг оғир вазиятлар Роттердам, Антверпен ва Гамбург портларида кузатилмоқда. Мутахассислар бу ҳолат камида яна бир неча ой давом этишини тахмин қилмоқда.

Нидерландиянинг WEC Lines компанияси раҳбари Сезар Луикенарнинг айтишича, “барча йирик логистика марказлари ҳаддан ташқари тўлиб кетган”. Euro-Rijn Group компанияси бош директори эса бу юк ортиқлигини “пандемиядан бери энг каттаси” деб атаган.

Contargo логистика компаниясининг маълумотларига кўра, ҳозирда Антверпенда контейнер юклашни кутиш муддати ўртача 66 соатни, Роттердамда эса 77 соатни ташкил қилмоқда.

Антверпен портида денгиз кемалари 3–5 кун кечикиш билан келмоқда, бу эса контейнерларни ўз вақтида олиб кетишни имконсиз қилмоқда.

Порт операторлари муаммони ҳал қилиш учун янги ходимлар ёлламоқда ва техника харид қилмоқда. Роттердамдаги йирик операторлардан бири ECT ҳолатни оғир деб эътироф этган, лекин бу муаммо бутун Шимолий Европа портлари учун умумий эканини билдирган.

Антверпен-Брюгге порти маъмурияти юк ҳажмининг кўпайганини тасдиқлаб, тизимлар ҳали ҳам режалаштирилган қувват доирасида ишлаётганини маълум қилган.

Бироқ айрим соҳа вакиллари вазият тезда тузатилишига ишонмаяпти.