Европа Эронга қарши санкция киритмоқчи

Еврокомиссия мамлакатда тартибсизликларга қарши кураш давом этаётгани учун Эронга нисбатан янги санкциялар ишлаб чиқмоқда ва намойишчиларни тўлиқ қўллаб-қувватламоқда. Тегишли баёнот ушбу орган раҳбари Урсула фон дер Ляйен томонидан Х (собиқ Twitter) га жойлаштирилди. 

“Европа Иттифоқининг ташқи ишлар ва хавфсизлик сиёсати бўйича олий вакили Кая Каллас билан яқин ҳамкорликда қисқа вақт ичида қатағонлар учун масъулларга қарши янги санкцияларни тақдим этамиз”, деб ёзди у.  

Фон дер Ляйеннинг қўшимча қилишича, Брюсселнинг фикрича, ҳукуматга қарши акциялар иштирокчилари эркинликка эришиш учун жасорат билан юриш қилмоқда, ҳуқуқ-тартибот органлари эса ҳаддан ташқари куч ишлатмоқда.

Бир қатор европалик сиёсатчилар ва фаолларнинг АҚШ ортидан Эрон Ислом инқилоби қўриқчилари корпусини террорчилик ташкилоти деб эълон қилиш ҳақидаги чақириқларига жавобан Еврокомиссия раиси Европа Иттифоқи уни инсон ҳуқуқларини бузгани учун аллақачон санкциялар рўйхатига киритганини айтди. 

Мамлакатдаги тартибсизликлар 29 декабрь куни Эрон риали курсининг кескин пасайиши туфайли бошланган ва аксарият йирик шаҳарларга тарқалган. Расмийлар 38 нафар ҳуқуқ-тартибот ходими ҳалок бўлганини маълум қилди. 8 январдан бошлаб, ТИВ раҳбари Аббос Ароқчининг сўзларига кўра,  намойишчилар орасида қуролланган террорчилар пайдо бўлган. Эрон расмийлари тартибсизликларни уюштирганлик учун жавобгарликни Исроил ва АҚШ зиммасига юклади. Америка Президенти Дональд Трамп аввалроқ Эрон Ислом Республикасига қарши куч ишлатиш имкониятини жиддий кўриб чиқаётгани ҳақида огоҳлантирган эди.

Эслатиб ўтамиз, АҚШ Президенти Дональд Трамп Эрон билан ҳамкорлик қилаётган барча давлатларга нисбатан 25 фоизлик божлар жорий қилди.