ЕИ Россияга қарши 19-санкция пакетини тасдиқлади

Бугун, 19 сентябрь куни Европа Комиссияси Россия гази ва банкларига нисбатан янги чекловлар тўпламини имзолади. Бу ҳақда ЕИ матбуот хизмати хабар берди.

Билдирилишича, янги санкциялар пакетининг асосий мақсади Европа Россиядан қазиб оладиган ёқилғидан даромадини камайтириш, Россиядан суюлтирилган газни Европа Иттифоқига олиб киришни тақиқлаш, қурол-яроғ ва технология экспортини тўхтатиш, нефть нархини 47,60 долларга чеклаш, компанияларга қарши активларни музлатишдир.

“Афсуски, сўнгги бир ой ичида Россия дипломатия ва халқаро ҳуқуққа нисбатан ҳурматсизлигини тўлиқ кўрсатди. У Украинага қарши уруш давомида энг йирик дрон ва ракета ҳужумларини уюштирди, ҳукумат бинолари ва фуқароларнинг уйларига, бизнинг иттифоқимизнинг Киевдаги ваколатхонасига зарба берди. Иттифоқимизга таҳдидлар ҳам ортиб бормоқда. Сўнгги икки ҳафта ичида Россиянинг учувчисиз учоқлари Польша ва Руминияда ҳам ҳаво ҳудудини бузди. Бу тинчликни хоҳлайдиган одамнинг ҳаракатлари эмас. Президент Путин яна кескинлашди. Бунга жавобан Европа ўз босимини оширмоқда. Шунинг учун бугун мен 19-санкция пакетимизни тақдим этаман”, деган  Европа Комиссияси президенти Урсула фон дер Ляйен.

Шунингдек, ЕИ етакчиси Россия Украина билан адолатли ва мустаҳкам тинчлик учун музокаралар столига ўтирмагунча санкциялар жорий қилишда давом этишини айтиб, Европа бошиданоқ Украина томонида бўлганлигини таъкидлаган.

“Биз бу шафқатсиз урушни тугатиш учун қўлимиздан келган барча ишни қиламиз. Мен ЕИ га аъзо давлатларни ушбу янги санкцияларни тезда маъқуллашга чақираман. Биз Россиянинг жанг майдонини тарк этиб, музокара столига келишини истаймиз. Бу тинчлик учун ҳақиқий имконият беришнинг йўлидир”, дея нуқтини тамомлаган фон дер Ляйен.

Эслатиб ўтамиз, аввалроқ Европа Иттифоқи Россиянинг Украинага қарши давом этаётган агрессив уруши муносабати билан янги санкциялар жорий қилаётганлиги ҳақида хабар берилган эди.

Бунёд Келдибоев