ЕИнинг 7 давлати Россиядан энергия ресурслари импортини оширди

2022 йилдан буён Европанинг Россия энергия таъминотига қарамлиги 90 фоизга камайганига қарамай, 2025 йилнинг дастлабки саккиз ойида Европа Иттифоқи Россиядан 11 миллиард евродан ортиқ миқдорда энергия ресурсларини импорт қилган. Бу ҳақда “Reuters” хабар берди.

Нашрнинг ёзишича, импорт ҳажмини оширган мамлакатлар орасида Венгрия, Франция, Бельгия, Нидерландия, Руминия, Хорватия ва Португалия бор. Хусусан, Франция Россиядан ёқилғи импортини 40 фоизга ошириб, 2,2 миллиард еврога етказган, Нидерландияда эса бу кўрсаткич 72 фоизга ошиб, 498 миллион еврога чиққан. Россия газидан бутунлай воз кечиш ғоясини рад этаётган ва Кремль билан яқин алоқаларни сақлаб қолган Венгрия ҳамда Словакия умумий пул миқдорининг 5 миллиард евросини ташкил этган. Венгрияда импорт қиймати 11 фоизга ошган.

Қайд этилишича, Европа Иттифоқи аллақачон Россия энергия ресурсларининг аксар қисмини сотиб олишни тақиқлаган ва 2027 йилгача Россиядан суюлтирилган табиий газ (СТГ) импортини тўлиқ тўхтатишни режалаштирган. Ҳозирда СТГ Евроиттифоқнинг Россиядан қилаётган энергетика харидларининг деярли ярмига тенг. CREA маълумотларига кўра, 2022 йилдан буён Европа Иттифоқининг Россиядан импорт қилган энергия ресурслари умумий қиймати 213 миллиард евродан ошган. 

Бельгия Энергетика вазирлиги импорт ҳажмининг ошишини Европа Иттифоқи санкциялари билан изоҳлаган. Ушбу чекловларга кўра, Россиядан келтирилган суюлтирилган табиий газ Бельгия портларида туширилиши лозим бўлган, яъни у бошқа кемаларга ортилиб, якуний манзилга юборилмаслиги керак эди.

Эслатиб ўтамиз, аввалроқ Россия жорий йилнинг январь-август ойларида Ўзбекистон, Қозоғистон ва Қирғизистонга газ етказиб беришни 15 фоизга оширгани ҳақила хабар берилган эди.