ЕИ Россияга қарши 19-санкциялар пакетини тасдиқлади

Европа Иттифоқи мамлакатлари Россиянинг Украинага қарши олиб бораётган уруши сабабли 19-санкциялар пакетини бир овоздан маъқуллади. Бу қарор кеча, 22 октябрь куни Брюсселда бўлиб ўтадиган Европа Кенгаши саммити арафасида қабул қилинди.

Янги чекловлар бир овоздан маъқулланган. Уларга охиргилардан бўлиб Словакия рози бўлган. Аввалроқ, Австрия ҳам пакетга тўсиқ қўймаслигини билдирган эди. Шунингдек, Венгрия Бош вазири Виктор Орбан Европа Кенгаши йиғилишига кечикишини маълум қилган ва ўз овозини Словакия Бош вазири Роберт Фицо орқали берган.

Еврокомиссия сентябрь ўрталарида тақдим этган ушбу 19-пакетга кўра, 2027 йил 1 январдан бошлаб Россиядан суюлтирилган табиий газ импорти тўлиқ тақиқланади. Бундан ташқари, “соя флоти” деб аталган рўйхат, яъни Россиянинг энергетика маҳсулотлари билан яширин равишда шуғулланувчи кемалар рўйхати кенгайтирилади. Санкциялар, шунингдек, Россия энергия ресурсларини учинчи давлатлар орқали, жумладан криптовалюталар ёрдамида сотишга кўмаклашаётган компанияларга ҳам татбиқ этилади.

Кутилишича, янги чекловлар “Роснефть” ва “Газпром нефть” билан ҳар қандай битимларни тақиқлайди ва Россия нефтига белгиланган нарх чегарасини пасайтиради. Пакетни ишлаб чиқиш жараёнида Россия фуқароларига туристик Шенген визаларини беришга чеклов қўйиш масаласи ҳам кўриб чиқилган эди, бироқ якунда у санкциялар рўйхатига киритилмади.

Эслатиб ўтамиз, аввалроқ Европа Иттифоқи давлатларининг Энергетика вазирлари иттифоққа аъзо барча мамлакатларни Россия газидан воз кечишини назарда тутувчи лойиҳани автоматик тарзда маъқуллаши кутилаётганди. Ушбу ташаббусга Венгрия ва Словакия қарши чиққан, чунки улар бу қарор улкан молиявий йўқотишларга олиб келиши мумкинлигини таъкидлаган. Москва эса бу каби санкцияларни қатъий қоралаган.