Ярим финалнинг иккинчи жанги. Бугун “Барселона” “Интер”ни имтиҳондан ўтказади

Бугун, 30 апрель куни Европа Чемпионлар лигаси ярим финал илк ўйини доирасида “Барселона” ўз уйида “Интер”ни қабул қилади. 

Ҳар бир фронт учун курашаётган “Барселона”

Ханси Флик бошчилигидаги Каталония клуби жорий мавсумда барча турдаги соврин учун курашни давом эттирмоқда. Ла Лигада етакчиликни қўлга олган жамоа энг яқин таъқибчиси “Реал Мадрид”дан 4 очко олдинда.  Испания кубоги финалида эса мадридликлар таслим этилди ва соврин қўлга киритилди. Эндиги навбат Чемпионлар лигасига. Ушбу турнир ярим финалида эса “кўк-анорранглилар” Италиянинг “Интер”ига қарши тўқнаш келадиган бўлди. Мазкур баҳсда фаворит ”Барселона”, аммо “Интер” ҳам ярим финалга ўзидан ўзи келиб қолгани йўқ. Лекин икки жамоада ўйиндан олдинги кайфият ҳар хил. “Барселона” Испания кубоги финалида “Реал Мадрид”ни мағлуб этди ва кубокни қўлга киритган бўлса, “Интер” турли мусобақалардаги сўнгги 4 та ўйинда ғалаба қозона олмаяпти.

Жамоа А Серия доирасидаги охирги ўйинда ўз уйида “Рома”га мағлуб бўлди ва турнир жадвалида “Наполи”ни ўтказиб юборди. Неаполликлар билан орадаги фарқ 4 тани ташкил этади. Италия кубоги ярим финалида ҳамшаҳарлари “Милан”га 3:0 ҳисобида мағлуб бўлди ва турнирни тарк этди. Чемпионлар лигасида эса мавсумнинг энг барқарор клубларидан бири “Барселона”га қарши тўқнаш келади. 

Кимнинг тактикаси кучли бўлса ўша ғолиб бўлади

Аввало, “Барселона” ҳақида. Ханси Флик келганидан кейин каталонияликлар ҳужумкор жамоага айланди қолди. Клуб ҳар бир ўйинда нечта гол урса ҳам ҳужумкорликни тўхтатмади. Жамоадаги тезкор қанотлар, интеллекти баланд плеймейкерлар ғалабанинг асоси бўлиб хизмат қилмоқда. Шунингдек, Флик ҳимояда ҳам барқарорликка эришди. Кунде ва Бальде ажойиб формада, марказий ҳимоячилар Кубарси ва Мартинес ҳам ёмон ўйнамаяпти. Орада жароҳатидан секин-аста тикланаётган Араухога имкон берилмоқда. Дарвозабон Шесни эса алоҳида мавзу. Аслида захира дарвозабони бўлиш учун жамоага жалб қилинган польшалик посбон Испания Суперкубоги финалида “Реал”га қарши фантастик ўйин намойиш этганидан кейин жамоанинг асосий дарвозабонига айланди. Тўғри, у жамоасини бир қанча яққол голлардан қутқаради, аммо шунга яраша жуда қўпол хатоларга йўл қўйиши ҳам бор гап. 

Эндиги навбат “Интер”га. Милан шаҳри клуби, ҳимоявий тактикани хуш кўради. Жамоа мураббийи Инзаги ҳимояга асосланган тактикани қўллайди. Учта марказий ҳимоячи ва иккита қанот латераллари, марказий ярим ҳимоя ва таянчни биргина Барелланинг ўзига топширилган. Ҳужумларни ташкил этиш Хакан Чалхануглу зиммасида. Марказий ҳужумда иккита форвард, Лаутаро Мартинес ва Маркус Тьюрам. Иккиси ҳам вазиятларни увол қилмайдиганлар хилига киради. 

Хулоса ўрнида айтиш мумкинки, “Интер”нинг қарши ҳужумлари доимо хавфли бўлиб келган. Бу “Бавария”га қарши икки ўйинда ҳам яққол исботини топган. Юқорида келтирилган факторларни ҳисобга олиб, бугунги ўйин мухлисларни зериктириб қўймаслиги тайин.

Тахминий таркиблар

 Одатга кўра, “Opta” ва “One football” порталлари “Барселона” - “Интер” ўйини учун тахминий таркибларни эълон қилди.

“Opta” талқинига кўра, “Барселона” тариби:

Шесни, Кунде, Араухо, Кубарси, Мартин, Педри, Де Йонг, Ольмо, Рафинья, Ямаль, Ферран.

“Opta” талқинига кўра, “Интер” тариби:

Зоммер, Павар, Ачерби, Бастони, Дармиан, Барелла, Чалхануглу, Мхитарян, Димарко, Тареми, Лаутаро.

“One football” талқинига кўра, “Барселона” тариби:

Шесни, Кунде, Мартинес, Кубарси, Мартин, Педри, Де Йонг, Ольмо, Рафинья, Ямаль, Ферран.

“One football” талқинига кўра, “Интер” тариби:

Зоммер, Павар, Ачерби, Бастони, Дармиан, Барелла, Чалхануглу, Мхитарян, Димарко, Тареми, Лаутаро.

Маълумот ўрнида, “Барселона” - “Интер” ўртасидаги ўйин Тошкент вақти билан 1 майга ўтар кечаси 00:00 да старт олади.