Японияда геймерлар учун каравот ишлаб чиқилди

Япониянинг Bauhutte компанияси ўзининг ғайриоддий ишланмаси – Electric Gaming Bed 2 нинг иккинчи версиясини чиқарди. Бу дам олиш, ўйин ўйнаш ва контент томоша қилишни турмасдан бирлаштиришни хоҳлайдиганлар учун мўлжалланган каравотнинг такомиллаштирилган варианти. Бу ҳақда “Playground” хабар берди.

Янги қурилма қисмларга ажраладиган конструкцияга эга бўлган: энди асос бир нечта секцияларга бўлинади, бу эса уни ташиш ва кўчиришни осонлаштиради. Йиғилган ҳолатда бу электр юритмали одатий каравот бўлиб, унинг юқори ва пастки қисмларини кўтариш имконияти мавжуд. Фойдаланувчи тана ҳолатини тўлиқ ётишдан ярим ўтиришгача осонгина ўзгартириши мумкин.

Олдинги версиянинг асосий муаммоларидан бири секциялар кўтарилганда матраснинг сирғалиб кетиши эди. Янги моделда бу камчилик бартараф этилган: матрас маҳкамланади ва қиялик бурчагидан қатъи назар ўз жойида қолади.

Аслида, қурилма аввалги ғояни сақлаб қолган – бу шунчаки каравот эмас, балки кундалик ҳаётнинг ўзига хос “бошқарув маркази”дир. Унда биргина тугмани босиш орқали режимларни алмаштириб, ухлаш, ўйин ўйнаш ёки фильм томоша қилиш мумкин.

Қизиғи шундаки, созланувчи секцияли технологиялар анчадан бери ҳаракати чекланган инсонлар учун тиббий каравотларда қўлланиб келинади. Бироқ Bauhutte айнан геймерларга урғу бермоқда, бу эса бир оз баҳсли кўринади: худди шу функциялар реабилитация ёки сурункали касалликларда ҳам фойдали бўлиши мумкин.

Япониядаги нархи каркас учун тахминан 70 400 иенани (тахминан 50 доллар) ташкил этади, матрас эса алоҳида сотиб олинади. Халқаро бозорга чиқиши ҳақида ҳозирча маълумот йўқ.