Вучич митинглар фонида халққа мурожаат йўллайди

Сербия Президенти Александр Вучич Белградда содир бўлган тартибсизликлар ортидан бугун, 29 июнь куни маҳаллий вақт билан соат 11:00 да халққа мурожаат қилади. Бу ҳақда “Srbija danas” нашри хабар берди.

Маълум қилинишича, кеча, 28 июнь куни Вучич Instagram саҳифасида “охир-оқибат Сербия доим ғалаба қозонади” деб ёзган ва серб байроғини кўтариб турган суратини жойлаган.

“Улар Сербияни йўқ қилишни исташди, лекин улардан ҳеч нарса чиқмади. Яшасин Сербия!”, дея қўшимча қилган ўз баёнотида Сербия раҳбари.

Сербияда оммавий норозиликлар тўлқини 2023 йилнинг ноябрь ойидан буён давом этмоқда. Бунга Новий-Саддаги темирйўл вокзалида бетон том қопламасининг қулаб тушиши сабаб бўлган. Норозилар бу фожиани коррупция билан боғламоқда ва муддатидан олдин сайловлар ўтказилишини талаб қилмоқда.

28 июнь куни пойтахт Белград марказидаги Славий майдонида ўтказилган митингдан сўнг полиция билан тўқнашувлар юз берган. Сербия полицияси раҳбарининг айтишича, олти нафар полициячи жароҳатланган.

Унинг сўзларига кўра, икки митинг бўлиб ўтган – бири Славий майдонида, иккинчиси эса Пионерлар боғи ва парламент биноси олдида. Славий майдонидаги митинг соат 21:00 атрофида тугаган бўлса, иккинчиси яна бироз давом этган. Славий майдонидаги митинг тугагач, намойишчиларнинг бир қисми парламент биноси олдида тўпланган. Бу вақтда полиция тўсиғи ёриб ўтилган ва тўқнашувлар бошланган. Полиция намойишчиларга қарши кўздан ёш чиқарувчи газ қўллаган. Тахминан ўн киши қўлга олинган.

Вучич эса Сербиядаги нотинчликлар ортида “ғарбнинг ўргатувчилари” турганини айтиб, мамлакатда “рангли инқилоб” уюштириш ҳаракатларида уларни айбламоқда.