Вето вақтида “хорижий агентлар” тўғрисидаги қонунга ўзгартиришлар киритилмайди – Зурабишвили 

Грузиядаги “хорижий агентлар” тўғрисидаги қонунга Президент вето қўйиши вақтида ўзгартиришлар киритилмайди. Бу ҳақда мамлакат Президенти Саломе Зурабишвили Польшанинг TVP World телеканалига берган интервьюсида маълум қилди.

"Уни (қонунни) ўзгартириш мумкин эмас. Европага қарши бўлган ушбу қонунни бирданига кичик тузатишлар киритиш орқали бизни Европага яқинлаштирадиган шаклга келтириб бўлмайди", дейди Зурабишвили журналистнинг вето қўйиш жараёнида Президент томонидан қонун лойиҳасини парламентга қайта таклиф қилиш орқали муросага эришиш мумкинми, деган саволига жавоб берар экан.

Зурабишвилига кўра, ҳукмрон “Грузия орзуси – Демократик Грузия” партияси қонунни мустақил равишда ва Президент ветосисиз ўзгартириш имкониятига эга.

"Улар қонунни қайтариб олиши, тўхтатиб туриши, ўзлари ўзгартириши мумкин", дейди Зурабишвили.

Қайд этиш жоизки, 14 май куни Грузия парламенти “Хорижий таъсирнинг шаффофлиги тўғрисида”ги қонунни учинчи ўқишда қабул қилган ва бу Европа Иттифоқининг мамлакатнинг ЕИга интеграциялашувини тўхтатиб қўйиш таҳдидлари ҳақида кескин баёнотларига сабаб бўлган. Қонун қабул қилинишидан олдин ҳам Зурабишвили унга вето қўйишини айтган эди. Президент буни 28 майгача бажариши керак.

Грузия Бош вазири Ираклий Кобахидзе эса агар Президент томонидан берилган асосли мулоҳазалар қабул қилинса, парламент вето қўйишни қўллаб-қувватлаши мумкинлигини айтган.

Президентнинг парламент бўйича котиби Гиоргий Мсхиладзе эса Зурабишвили вето ҳақидаги мулоҳазаларида Венеция комиссиясининг тавсияларини инобатга олишини билдирган.

Маълумот учун, “Хорижий таъсирнинг очиқлиги тўғрисида”ги қонун лойиҳасини кўриб чиқиш апрель ойида бошланган. Ўшандан бери Грузияда кенг кўламли намойишлар бўлиб ўтмоқда. Бир неча марта улар хавфсизлик кучлари билан тўқнашувга айланган. Қонунга АҚШ, Европа Иттифоқи, БМТ, НАТО, Европада Хавфсизлик ва Ҳамкорлик Ташкилоти ва Европа Кенгаши қарши. Европа етакчилари бу қонун Европа қадриятларига зид эканини айтмоқда. Грузиянинг ҳукмрон партияси етакчиларининг таъкидлашича, у фақат нодавлат сектор ва оммавий ахборот воситаларининг хориждан молиялаштирилиши шаффофлигини таъминлашга хизмат қилади.