Вазият жиддий. АҚШ Венесуэла қайиғини йўқ қилди (видео)

АҚШ Президенти Дональд Трамп Венесуэладан АҚШ томонга ҳаракатланаётган “наркотеррористлар” қайиғига қарши зарба берилганини маълум қилди. Бу ҳақда у Truth Social ижтимоий тармоғида ёзиб қолдирди.

Унга кўра, АҚШ ҳарбийлари халқаро сув ҳудудида гиёҳванд моддалар олиб кетаётган кемани нишонга олган. Трампнинг сўзларига кўра, кема Қўшма Штатлар томон йўл олган бўлиб, ҳужум оқибатида уч нафар “наркотеррорист” ҳалок бўлган, америкалик ҳарбийларларга эса ҳеч қандай зиён етмаган. 

“Ушбу наркотеррористларга Венесуэладан АҚШга ноқонуний гиёҳванд моддалар олиб кетаётганида зарба берилди. Бу шафқатсиз картеллар миллий хавфсизликка, ташқи сиёсатга ва АҚШнинг ҳаётий манфаатларига таҳдид солмоқда”, дея ёзган Оқ уй раҳбари. 

У, шунингдек, огоҳлантириш бериб: "Агар сиз америкаликларни ўлдириши мумкин бўлган наркотикларни ташиётган бўлсангиз, биз сизнинг ҳар қадамда пойлаймиз”, деган. Трампнинг таъкидлашича, картелларнинг ноқонуний фаолияти ўн йиллар давомида АҚШ жамиятларига катта зарар етказиб, миллионлаб одамларнинг ҳаётига зомин бўлган.

Август ойида “The New York Times” Трамп яширин равишда Лотин Америкаси наркокартелларига қарши ҳарбий куч ишлатиш бўйича Пентагон (янги Уруш вазирлиги) учун директива имзолаганини ёзганди. Ўша ой охирида АҚШ Венесуэла қирғоқларига 7 та ҳарбий кемани, жумладан, учта ракетага эга эсминец ва камида битта зарба берувчи сув ости кемасини, жами 4,5 минг аскар билан юборган.

2 сентябрь куни Трамп Венесуэладан келаётган яна бир наркотик ортилган кема АҚШ ҳарбийлари томонидан йўқ қилинганини эълон қилган эди. Кейинчалик у бу операцияда 11 нафар “Tren de Aragua” картели аъзолари ўлдирилганини билдирди. АҚШ бу гуруҳни 2025 йилнинг февралида террорчи ташкилотлар рўйхатига киритган ва Трамп уни “Мадуро назорати остида” деб атаган. 

АҚШ расмийлари Венесуэла Президенти Николас Мадурони наркотик савдоси билан шуғулланишда айблаб, уни ушлашга ёрдам берганлар учун 50 миллион доллар мукофот ваъда қилган.

Мадуро эса Венесуэладан келаётган кемаларнинг йўқ қилинишини “сўнгги юз йилдаги АҚШ босқинининг энг жиддий таҳдиди” деб атаган. Унинг сўзларига кўра, Учинчи жаҳон уруши бошланган ва АҚШ бунга аллақачон режа тузган.