Вашингтондаги авиаҳалокат: 67 кишининг жасади топилди

Кеча, 4 февраль куни қутқарувчилар АҚШнинг Вашингтон шаҳрида ҳалокатга учраган Bombardier CRJ700 йўловчи самолёти ва у билан тўқнашган вертолётда бўлган умумий 67 нафар қурбоннинг жасадини Потомак дарёсидан чиқариб олди. Бу ҳақда Вашингтон ёнғин ва тез тиббий ёрдам хизмати бўлими Х саҳифасида хабар берди.

“Қўшма қўмондонлик ҳаво кемаларининг тўқнашуви оқибатида қурбон бўлган 67 киши чиқарилганини тасдиқлайди”, дейилади баёнотда.

Шунингдек, 66 кишининг шахси аниқлангани маълум қилинди.

Маълумот учун, олдинроқ “The New York Times” газетаси Федерал фуқаро авиацияси бошқармасининг дастлабки ҳисоботига таяниб, Вашингтон Рональд Рейган аэропортида самолёт ва вертолётнинг тўқнашуви вақтида диспетчерлик сменаси тўлиқ бўлмаганини, битта мутахассис бир вақтнинг ўзида бир нечта вазифани бажарганини, жумладан, вертолётлар ҳаракатини мувофиқлаштириш ва самолётларнинг қўнишини назорат қилганини ёзди. Кейинчалик NBC телеканали, аэропортдаги ҳаво ҳаракатини бошқариш хизмати раҳбари диспетчерлардан бирига сменадан олдинроқ кетишга рухсат берганини хабар қилди. Ҳаво кемалари ҳалокатига шу омил асосий сабаб бўлиши мумкин.

Эслатиб ўтамиз, 30 январга ўтар кечаси Вашингтондаги Рональд Рейган аэропортида American Airlines авиакомпаниясига тегишли Bombardier CRJ700 минтақавий йўловчи самолёти ҳарбий Sikorsky H-60 ( Black Hawk ) вертолёти билан қўниш чоғида тўқнашганди. Лайнер бортида 60 нафар йўловчи ва тўрт экипаж аъзоси бўлган, вертолётда эса уч киши бор эди.