“Вақт тугаб бормоқда!” Трамп Эронни огоҳлантирди

АҚШ Президенти Дональд Трамп урушни тугатиш бўйича музокаралар тўхтаб қолгани ортидан Эронни огоҳлантириб, вақт ўтиб бораётганини эслатди. Бу ҳақда у ўзининг Truth Social платформасида ёзди.

“Улар тезроқ ҳаракат қилишлари керак, акс ҳолда улардан ҳеч нарса қолмайди. Вақт жуда муҳим!” деб ёзган у.

Бугун, 18 май куни Эрон АҚШнинг сўнгги таклифига жавоб берганини ва Вашингтон билан музокаралар Покистон воситачилиги орқали давом этаётганини маълум қилган.

“Кеча айтганимиздек, хавотирларимиз Америка томонига етказилди”, дейди Эрон Ташқи ишлар вазирлиги матбуот котиби.

Қайд этиш жоиз, Трампнинг бу сўзлари апрель бошида ўт очишни тўхтатиш келишуви эълон қилиниши олдидан айтилган “Эрон келишувга рози бўлмаса, бутун бир цивилизация ҳалок бўлиши мумкин” деган таҳдидини эслатади.

Эслатиб ўтамиз, аввалроқ АҚШ Эронга тинчлик музокараларини қайта бошлаш учун бажарилиши лозим бўлган 5 та талабдан иборат рўйхатни эълон қилган эди.