Ўзжан Дениз “Қизил ғунчалар” сериали съёмкаси пайтида юрак хуружини бошдан кечирди

“Истанбуллик келин”, “Сув ва олов”, “Ишкомли уй” сериалларидаги роллари билан ўзбек телетомошабинларининг кўнглидан жой олган 52 ёшли туркиялик актёр ва қўшиқчи Ўзжан Дениз юрак хуружига учради. Бу ҳақда “Turkiye” нашри хабар берди.

Қайд этилишича, кеча, 17 февраль куни актёр “Қизил ғунчалар” сериалида суратга тушаётган бўлган ва шу пайтда юрак хуружини бошдан кечирган.  Биринчи ёрдам кўрсатилгандан сўнг у шифохонага олиб кетилган. Ўзжан Денизга ангиография ўтказилган ва у даволаниш учун уйига юборилган.  Маълум қилинишича, Дениз икки ҳафта ичида яна шифохонага боради ва юрагидаги томирига стент ўрнатилади.

Бир муддат ўтгандан сўнг актёр Instagram саҳифасидаги сторисида аҳволи ҳозирда яхши эканини маълум қилган.

“Аввало, мени ўйлаб, қўнғироқ қилиб, сўраб, хабар берган барча дўстларим ва яқинларимга миннатдорлик билдираман. Эрталаб тасвирга олиш майдончасида инфарктни бошдан кечирдим. Шифокоримнинг ёндашуви ва севгилимнинг ғамхўрлиги туфайли бу ортда қолди. Ҳозирда ўзимни яхши ҳис қиляпман, ҳаммаси жойида”, дейди у.