Ўзбекистоннинг олтин-валюта захиралари тарихий кўрсаткичга етди

Ўзбекистоннинг олтин-валюта захиралари тарихда илк бор 48 миллиард доллардан ошди. Бу ҳақда Президент Шавкат Мирзиёев бугун, 29 август куни Тошкентдаги “Янги Ўзбекистон” боғида бўлиб ўтаётган мамлакат мустақиллигининг 34 йиллигига бағишланган байрам тадбирида маълум қилди.

Унда давлат раҳбари мамлакатда тадбиркорлик иқтисодиётни ҳаракатга келтирувчи, олдинга бошловчи катта кучга айланганини таъкидлади. Ўзбекистон етакчисига кўра, кейинги саккиз йилда мамлакатнинг ялпи ички маҳсулоти 2 карра ошиб, 2024 йилда 115 миллиард долларга, экспорт ҳажми 26 миллиард долларга етган. 2025 йил якунигача ялпи ички маҳсулот 130 миллиард доллар бўлади.

Маълум қилинишича, республиканинг олтин-валюта захиралари тарихда илк бор 48 миллиард доллардан ошган. Ўтган саккиз йилда Ўзбекистонга қарийб 130 миллиард доллар хорижий инвестициялар кириб келган.

Эслатиб ўтамиз, жорий йилнинг 1 июнь ҳолати бўйича Ўзбекистоннинг олтин-валюта захиралари 49 миллиард 665 миллион долларни ташкил этди. Унга кўра, йил бошидан буён Ўзбекистоннинг олтин-валюта захиралари 8 миллиард 483 миллион долларга кўпайган ва 20,6 фоиз ўсишни қайд этган. Шу тариқа бу ўсиш кетма-кет 5-ой давом этмоқда. Хусусан, апрель ойи билан солиштирганда бу кўрсаткич 410,2 миллион долларга ёки 0,83 фоизга ошган. Шунингдек, Ўзбекистоннинг олтин-валюта захиралари 2013 йилдан (22 миллиард 408 миллион доллар) бери кузатувлар тарихидаги энг юқори кўрсаткичга етди. Шу билан бирга, ҳисоботга кўра захиралардаги олтин миқдорининг физик ҳажми бироз камайган ва 11,4 троя унцияни (353,85 тонна) ташкил этган. Шунга қарамай, қимматбаҳо металл нархининг кўтарилиши ортидан унинг нархи 2,2 миллион долларга ошиб, 37,65 миллиард доллар етган.