Ўзбекистонда ёшга доир пенсия автоматик тайинланиши мумкин

Бугун, 13 февраль куни Олий Мажлис Қонунчилик палатасида пенсия ёшига етган фуқароларга пенсиялар автоматик тарзда тайинланишини назарда тутувчи қонун лойиҳаси муҳокама қилинди ва биринчи ўқишда қабул қилинди. Бу ҳақда Олий Мажлис Қонунчилик палатаси хабар берди.

Қайд этилишича, пенсия олиш ёшига тўлган (эркаклар – 60 ёш, аёллар – 55 ёш) фуқароларга ёшга доир пенсияни белгилашда уларнинг алоҳида мурожаати талаб этилмайди.

“Фуқаронинг иш стажи, иш ҳақи ва бошқа маълумотлари вазирлик ҳамда идораларнинг ахборот тизимларидан олинган маълумотлар асосида бир кун муддатда проактив шаклда тайинлаш тартибини жорий этиш режалаштирилмоқда”, дейилади хабарда.

Шунингдек, қонун лойиҳасида фуқарода пенсия ёшига етганига қарамай меҳнат фаолиятини давом эттириш истаги бўлса, проактив шаклда тайинланадиган ёшга доир пенсияни рад этиш тартибини ҳам жорий этиш назарда тутилмоқда.

Қонун ташаббускорларининг фикрича, белгиланаётган нормалар фуқароларга пенсия таъминоти бўйича кўрсатиладиган давлат хизматининг сифатини оширишга, ортиқча бюрократик тўсиқларнинг бартараф этилишига хизмат қилади.

Эслатиб ўтамиз, 2024 йил 25 сентябрда Ўзбекистон Республикаси Вазирлар Маҳкамасининг “Давлат пенсия таъминоти тизимини ислоҳ қилиш концепциясини ишлаб чиқиш бўйича ташкилий чора-тадбирлар тўғрисида” қарори қабул қилинганди. Қарорда амалдаги давлат пенсия таъминоти тизимида мавжуд муаммоларни таҳлил қилиш ҳамда илғор хорижий тажриба асосида пенсия таъминоти тизимининг барқарорлигини таъминлаш ва ижтимоий адолатни мустаҳкамлашга қаратилган таклифларни тайёрлаш учун масъул ишчи гуруҳ ташкил этилиши белгиланган. Ишчи гуруҳ 2025 йил 1 мартга қадар давлат пенсия таъминоти тизимини ислоҳ қилиш концепцияси лойиҳасини ишлаб чиқиши ва киритиши зарур.