Ўзбекистонда ўлат билан боғлиқ эпидемиологик вазият барқарор – Нурмат Отабеков

Сўнгги кунларда Россия Федерациясининг Иркутск шаҳрида ўлат касаллиги бўйича гумон қилиниш ҳолати қайд этилгани ҳақида хабарлар берилмоқда. Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Отабеков Ўзбекистонда ушбу касаллик билан боғлиқ эпидемиологик вазият ҳақида маълумот берди.

“Аввало шуни айтиш керакки, мамлакатимизда ўлат касаллиги билан боғлиқ эпидемиологик вазият барқарор ва хавотирланишга ҳеч қандай асос йўқ”, дейди у.

Билдирилишича, Россия Федерациясининг “Роспотребнадзор” ташкилоти расмий маълумотларига кўра, Иркутск шаҳрида кузатилган ҳолатнинг ўлат касаллиги, хусусан, унинг ўпка шакли билан боғлиқ экани ҳозирча тасдиқланмаган. Айни пайтда мазкур ҳолат юзасидан тегишли текширувлар олиб борилмоқда.

Ўлат – бактериялар томонидан чақириладиган ўта хавфли юқумли касаллик. Унинг табиий ўчоқлари дунёнинг айрим ҳудудларида мавжуд. Хасталик асосан майда сут эмизувчи ҳайвонлар орасида учраб, инсонга кўп ҳолларда касалланган ҳайвонлар ва улардаги бургалар чақиши орқали юқиши мумкин.

Ўзбекистонда шу ва бошқа ўта хавфли юқумли касалликларнинг четдан кириб келиши ва тарқалишининг олдини олишга қаратилган зарур чора-тадбирлар тизими яратилган.

Хусусан, айни пайтда давлат чегараларини кесиб ўтиш жойлари (халқаро аэропортлар, темир йўл станциялари, автомобиль йўллари)да 53 та санитария назорат пункти фаолият юритмоқда. Улар орқали хориждан Ўзбекистонга кириб келаётган шахслар доимий тиббий кузатувдан ўтказилади.

Шунингдек, ҳудудий санитария-эпидемиология хизматларининг ўта хавфли юқумли касалликларни аниқлашга ихтисослашган лабораториялари зарур диагностик воситалар, озуқа муҳитлар, реагентлар ва реактивлар билан тўлиқ таъминланган.

Эслатиб ўтамиз, жорий йил 2 октябрга ўтар кечаси Шелехов туман шифохонасида ўлатга қарши институтда ишлаган 28 ёшли Дарья Шипилова вафот этганди. ОАВ унинг ўлимини ўпка ўлати билан зарарланишга боғлади. 1 октябрь куни шифохонанинг бир нечта бўлимларида беморларни қабул қилиш ва чиқариш тўхтатилди. Аёл билан мулоқотда бўлган 197 киши тиббий назоратга олинди.

4 октябрь куни Роспотребнадзор ходимда ноаниқ этиологияли пневмония – келиб чиқиши аниқланмаган ўпка яллиғланиши бўлганини маълум қилди. Идора маълумотларига кўра, унинг таҳлилларида касбий фаолияти билан боғлиқ микроорганизмлар топилмаган. Аёл билан мулоқотда бўлганларда COVID-19 ва риновирус инфекциясининг иккитадан ҳолати аниқланган. Бошқа қўзғатувчилар топилмаган.

6 октябрь куни Шелехов тумани раҳбари ўринбосари Елена Софина “хавфли ташхис” тасдиқланмаганини айтган. Унинг сўзларига кўра, эҳтиёт чораси сифатида карантинга жойлаштирилган одамларнинг 60 фоизи аллақачон қўйиб юборилган. Маҳаллий ОАВ аввалига чекловлар 200 га яқин кишига таъсир қилганини хабар қилган эди.

Иркутск вилоятидаги ўлат ҳақидаги хабарлар фонида Марказий Осиё мамлакатлари чегарада санитария назоратини кучайтиришни бошлади. Россия билан қуруқликдаги чегарасига эга бўлмаган Ўзбекистон ҳукумати бундай чораларни 3 октябрь куни жорий этди. Сўнгра Қозоғистон ва Қирғизистон ҳам кучайтирилган санитария-карантин назоратини ўрнатди.