Ўзбекистонда куз фаслида қандай об-ҳаво бўлиши прогноз қилинди

Гидрометеорология хизмати кириб келаётган сентябрь, октябрь ва ноябрь ойларида Ўзбекистон ҳудудида қандай об-ҳаво кузатилишини прогноз қилди.

Сентябрь

Кузнинг дастлабки 30 кунлигида Ўзбекистонда ўртача ойлик ҳаво ҳарорати республика бўйича меъёрида бўлиб, баъзи жойларда 1−1,5 даража юқори бўлади ва 18-25 даражани ташкил этади.

^{Ўртача ойлик ҳарорат аномалияси ва унинг ўртача кўп йиллик қийматлари прогнози}

Ойнинг биринчи ярмида ҳарорат асосан кечалари 13-18 даража, кундузи 33-38 даражага исийди. Иккинчи ярмида ҳарорат кечалари 13-18 даражадан 8-13 даражагача, кундуз кунлари 30-35 даражадан 23-28 даражагача тушади.

^{Ойлик ёғингарчилик миқдори аномалияси ва ой учун ёғингарчилик меъёри прогнози}

Ойлик ёғингарчилик миқдори меъёридан кам, баъзи жойларда нормаль бўлиши кутилмоқда (меъёр 3-8 мм, Қорақалпоғистон Республикаси, Хоразм, Бухоро, Навоий, Қашқадарё, Сурхондарё вилоятларида 0,02 мм, тоғ олди ва тоғли ҳудудларда 9-28 мм гача).

Октябрь

Ушбу ойда ўртача ойлик ҳаво ҳарорати республика бўйича меъёрида бўлиб, 10-12 даражани, жанубда 16-18 даража илиқ ҳаво ҳароратини ташкил этади.

^{Ўртача ойлик ҳарорат аномалияси ва унинг ўртача кўп йиллик қийматлари прогнози}

Ой давомида ҳарорат кечалари 10-15 даража илиқдан 3-8 даража илиққача ўзгариб туради, ой охирида 0/-2 даражагача совиши мумкин. Кундузи 23-28 даража илиқдан, 13-18 даражагача ўзгариб туради. Шимолда, ой давомида ҳаво ҳарорати кечалари 8-13 даража илиқдан, 1-6 даража ҳароратгача ўзгариб туради, 0/-3 даража совуқ ҳарорат ҳам кузатилиши мумкин. Кундуз кунлари 12-17 даража илиқдан, 20-25 даража илиққача ўзгариб туради.

^{Ойлик ёғингарчилик миқдори аномалияси ва ой учун ёғингарчилик меъёри прогнози}

Ойлик ёғингарчилик миқдори меъёр атрофида, баъзи жойларда меъёридан кўп, шимолда ва жанубда баъзи жойларда меъёридан кам (меъёр 12-26 мм, Қорақалпоғистон Республикаси, Хоразм, Бухоро, Навоий, Қашқадарё, Сурхондарё вилоятларида 3-11 мм, тоғ олди ва тоғли ҳудудларда 27-70 мм гача) бўлади.

Ноябрь

Мазкур ойда ўртача ойлик ҳаво ҳарорати ўртача кўп йиллик қийматларга яқин бўлиб, 2-8 даража илиқни, жанубда 10 даражагача илиқни ташкил этади.

^{Ўртача ойлик ҳарорат аномалияси ва унинг ўртача кўп йиллик қийматлари прогнози}

Мамлакат ҳудудининг катта қисмида ёғингарчилик меъёрий бўлиши прогноз қилинмоқда. Фақат республиканинг жануби-ғарбида бироз эҳтимоллик билан ёғингарчилик тақчиллиги бўлиши кутилмоқда.

^{Ойлик ёғингарчилик миқдори аномалияси ва ой учун ёғингарчилик}

Бу ойда ёғингарчилик меъёри 37-48 мм, Қорақалпоғистон Республикаси, Хоразм, Бухоро, Навоий, Сурхондарё вилоятларида ва Фарғона водийсининг айрим жойларида 8-36 мм, тоғ олди ва тоғли ҳудудларда 65-113 мм гача бўлади.