Ўзбекистон “Туркманбоши” денгиз портидан фойдаланмоқчи

Ўзбекистон Туркманистоннинг “Туркманбоши” денгиз порти инфратузилмасидан фойдаланишни режалаштирмоқда. Тошкентда ўтган Савдо-иқтисодий, илмий-техникавий, маданий-гуманитар ҳамкорлик бўйича Ўзбекистон-Туркманистон Ҳукуматлараро комиссиясининг 16-йиғилишида томонлар шу ҳақда музокара ўтказди.

Йиғилиш Ўзбекистон Республикаси Бош вазирининг ўринбосари - инвестициялар ва ташқи савдо вазири Сардор Умрзоқов ҳамда Туркманистон Вазирлар Маҳкамаси Раисининг ўринбосари Эсенмират Оразгелдиев ҳамраислигида бўлиб ўтди.

Йиғилиш кун тартиби инвестициявий, савдо-иқтисодий, саноат, энергетика, қишлоқ хўжалиги, сув хўжалиги, илмий-техник, транспорт ва транзит, маданий-гуманитар соҳалардаги ҳамкорликнинг кенг кўламли масалаларини қамраб олди.

Икки мамлакат ўртасида транспорт жиҳатидан ўзаро боғлиқликни яхшилашга алоҳида эътибор қаратилди. Жумладан, томонлар транспорт йўлакларини янада ривожлантириш, авиақатновларни босқичма-босқич қайта тиклаш, 2022 йилда ўзаро тариф имтиёзларини тақдим этиш, “Туркманбоши” денгиз порти инфратузилмасидан фойдаланиш истиқболлари ҳамда бошқа ташаббусларни назарда тутувчи қўшма чораларни ишлаб чиқиш ва қабул қилишга келишиб олдилар.