Ўзбекистон Осиё ўйинларида 32 йилдан сўнг ўқ отишдан олтин медаль олди

Бугун, 24 сентябрь куни Япониянинг Айчи–Нагоя шаҳарларида ўтаётган Осиё ўйинларининг 5-куни доирасидаги баҳслар давом этмоқда. Кун доирасидаги ўқ отиш спорт турлари баҳсларида Ўзбекистон делегацияси 32 йилдан сўнг олтин медални қўлга киритди.

Пневматик тўппонча билан 10 метр масофага отиш дастурида иштирок этган Владимир Свечников Осиё ўйинларида олтин медални қўлга киритди.

Ушбу ғалаба Ўзбекистоннинг ўқ отиш спорт турларида Осиё ўйинларида 32 йиллик танаффусдан кейин қўлга киритган илк олтин медали бўлди. Шунингдек, Свечников финалда 244,3 очко жамғариб, Осиё ўйинлари рекордини ҳам янгилади.

Шунингдек, кун доирасида бўлиб ўтган академик эшкак эшиш баҳсларининг W2x дастурида иштирок этган Айдана Сметуллаева ва Анна Аксёнова финишга иккинчи бўлиб етиб келиб, кумуш медални қўлга киритди. Бундан ташқари, Шаҳбоз Холмурзаев, Давржон Давронов, Меҳрожбек Маматқулов, Павел Сорин тўртлиги M4x йўналишида 5:48.96 сония натижа қайд этди ва бронза медалга эга чиқди.

Фазлиддин Каримов, Дилшоджон Худойбердиев, Максим Голубев, Алишер Турдиев квартети эса эркаклар ўртасидаги академик эшкак эшиш тўртлик дастурида 5:51.68 сония натижа билан иккинчи бўлди ва кумуш медалга эга чиқди.

Ҳозирга келиб Ўзбекистон делегациясининг Осиё ўйинларидаги жами медаллар сони 23 тага (4 та олтин, 11 та кумуш ва 8 та бронза) етди. Шу тариқа, Ўзбекистон умумжамоа ҳисобида 7-ўринга кўтарилди.

Эслатиб ўтамиз, аввалроқ Осиё ўйинларида олтин медаль олган ўзбекистонлик спортчиларга 25 000 АҚШ доллари миқдорда пул мукофоти берилиши ҳақида хабар берилганди.