UzAuto Motors янги Chevrolet Tahoe 2025 моделини тақдим этди. Имкониятлар ва нарх қандай? (фоторепортаж)

Жорий йилнинг 26 август куни “UzAuto Motors” АЖ янги Chevrolet Tahoe 2025 – High Country тақдимотини ўтказди. QALAMPIR.UZ тақдимотда иштирок этиб, автомобилнинг бошқа моделлардан ўзига хослиги ва хусусиятлари билан бевосита танишди.

Тақдимот давомида барча иштирокчилар учун байрам ташкил этилиб, мусиқали чиқишлар қилинди. Шунингдек, тақдимотда “UzAuto Motors” АЖ раҳбарияти, хусусан, бош директор Янош Ковач иштирок этди ва шахсан янги Tahoe 2025 моделини таништирди. Шунингдек, журналистлар томонидан берилган саволларга жавоб берди. 

Олдинги модель 343 от кучига эга 5,3 литрли двигатель билан жиҳозланган бўлса, ҳозирги двигатель 6,2 литрли бўлиб, 420 от кучига эга. Салонида 11 дюймли дисплейга эга рақамли қурилмалар панели, Head-Up проекцион дисплейи ҳамда 17,7 дюймли сенсорли экранга эга ахборот-кўнгилочар тизим билан жиҳозланган.

Янош Ковач автомобилнинг ўзига хос хусусиятлари ва унинг бозордаги ўрни ҳақида айтиб ўтди.

Йил бошидан буён 200 мингдан ортиқ бошқа моделдаги автомобиль ишлаб чиқариб, сотганмиз, шунинг учун Tahoe 2025 High Countryга ҳам қизиқиш юқори бўлишига ишонамиз”, деди UzAuto Motors бош директори Янош Ковач.

Тўлиқ хусусиятлар

Ушбу модель оиладаги энг кучли 6,2 литр ҳажмга эга V-симон шаклдаги 8 цилиндрли двигатель билан жиҳозланиб, 10 поғонали автоматик трансмиссия билан уйғунлашган. Бундай комбинация Tahoe’ни 420 от кучи билан таъминлайди, ёқилғи сарфида юқори тежамкорликка эга, 8 сонияда 100 км/соат тезликка чиқиш имконини беради.

Автомобиль тўлиқ юритиш тизими ва янги мослашувчан пневматик осма билан жиҳозланган бўлиб, у ўзига хос, ноёб дизайнга эга, оиладаги энг йирик 24 дюймли ғилдираклар билан биргаликда, энг мураккаб йўл шароитларида ҳам максимал қулайлик ва мукаммал бошқарув имкониятини таъминлайди.

Янги Tahoe 2025’нинг ташқи кўриниши хромланган элементлар, кўзга ташланувчи радиатор панжараси, анимацион чироқлар ва панорамали том билан жиҳозланган. Ҳайдовчи ва йўловчилар қулайлиги учун автоматик равишда чиқадиган зинапоялар ва юкхона эшигини контактсиз очиш тизими ўрнатилган. Ажралиб турувчи High Country эмблемалари эса бу автомобилнинг бутун Tahoe оиласидаги энг юқори комплектацияга мансуб эканини таъкидлайди.

Интерьерда ёғоч билан безатилган юқори сифатли материаллар ишлатилган. Етти ўринли салон чарм қопламали ўриндиқлар билан жиҳозланган бўлиб, уларда иситиш тизими мавжуд. Ҳайдовчи ва унинг ёнидаги йўловчи учун ўриндиқлар вентиляцияси ҳам назарда тутилган. Ҳайдовчи ўриндиғи 8 йўналишда электрон тарзда созланади ва фавқулодда вазиятларда вибрацион тебранишли қайта алоқа тизими билан жиҳозланган. 

11 дюймли дисплейга эга рақамли қурилмалар панели, Head-Up проекцион дисплейи билан уйғунлашиб, автомобиль ҳақидаги барча муҳим маълумотларни бевосита ҳайдовчининг кўриш майдонида акс эттиради. Бу эса бошқарув жараёнида юқори даражадаги хавфсизликни таъминлайди. 

Иккинчи қатордаги йўловчилар ихтиёрига индивидуал созлаш мумкин бўлган иқлим-назорати ва иккита 12,6 дюймли экранга эга кўнгилочар тизим ўрнатилган. Учинчи қатор ўриндиқлари катталар ҳам бемалол жойлашадиган қилиб ишлаб чиқилган, бу янги Tahoe’ни оилавий саёҳатлар ва бизнес трансферлари учун энг идеал танловга айлантиради.

“Ҳайдовчи ва йўловчилар хавфсизлиги – олд тўқнашув ҳақида огоҳлантириш билан автоматик фавқулодда тормозлаш функцияси, ҳаракатланиш бўлагини сақлаш тизими, мослашувчан круиз-назорати, юқори аниқликдаги атрофни кўриш камералари, шунингдек, орқага ҳаракатланиш ва пастга тушишда ёрдам бериш каби инновацион тизимлар томонидан таъминланади.

Chevrolet Tahoe High Country – бу афсонавий йўлтанламаснинг янги авлоди бўлиш билан бирга, тўлиқ ўлчамли йўлтанламаслар сегментида энг юқори даражани белгиловчи модель дейиш мумкин. Модель ҳар бир деталда ишонч ва нуфузни қадрлайдиганлар учун ишлаб чиқилган бўлиб, эгасининг мавқеини таъкидлаб туради”, дейилади компания расмий хабарида.

Янги Chevrolet Tahoe 2025 High Country автомобилининг тавсия этилган чакана нархи 1 464 500 000 сўмни ташкил этади. Сотувлар 2025 йил 11 сентябрда бошланиши режалаштирилган. Автомобилни расмий Chevrolet дилерларидан ёки savdo.uzavtosanoat.uz сайти орқали онлайн харид қилиш мумкин.

Қўшимча маълумотларни UzAuto Motors’нинг +99878 141 7777 рақамли колл-маркази ҳамда Chevrolet.uz сайтидан олиш мумкин.

Реклама ҳуқуқи асосида