“Уйқучи Дон қайтди”. Трампнинг мажлисдаги суратлари танқидларга учради(видео)

Ижтимоий тармоқларда АҚШ Президенти Дональд Трампнинг йиғилиш пайтида кўзларини юмган ҳолатда тушган суратлари тарқалди. Оқибатда Президент демократлар ва тармоқ фойдаланувчилари томонидан танқидга учради. Бу ҳақда CNN хабар берди.

Нашр маълумотига кўра, дам олиш кунлари ижтимоий тармоқларда Оқ уйдаги йиғилишда Трампнинг кўзлари юмилган ҳолатда ўтирган суратлари тарқалган. Президентнинг рақиблари бу лавҳадан фойдаланиб, унинг иш қобилияти ҳақида савол кўтарган.

Трамп ўша куни машҳур озиш дори воситалари нархининг пасайтирилгани ҳақидаги эълон тадбирида иштирок этган.

“Баъзи пайтларда Трампнинг кўзлари бутунлай юмилган, бошқа пайтларда эса уларни очиқ тутиш қийин бўлгандек туюлган. У вақти-вақти билан кўзларини уқалаб турган. Ушбу суратлар Трамп танқидчиларининг кескин эътирозига сабаб бўлди”, деб ёзади нашр.

Калифорния губернатори, Президентнинг асосий рақибларидан бири Гэвин Ньюсомнинг матбуот хизмати тадбирдан олинган суратларни “Уйқучи Дон қайтди” деган ёзув билан эълон қилган.

Бунга жавобан Оқ уй вакили Тейлор Рожерс Трамп ухламаганини билдирган.

“Президент ухламаган, аксинча, у бутун тадбир давомида сўзлаган ва матбуотнинг кўплаб саволларига жавоб берган. Бу тадбир америкаликлар учун диабет, юрак-қон томир касалликлари, семизлик ва бошқа касалликлар билан курашишда ёрдам берувчи икки дорининг нархини тарихий даражада пасайтириш эълони ҳақида эди”, дейди у.