Усик ва Фюри ўртасидаги жангнинг эҳтимолий вақти ва жойи аниқ бўлди

WBA Super, IBF ва WBO чемпиони украиналик Александр Усик ва британиялик боксчи WBC йўналиши бўйича Жаҳон чемпиони Тайсон Фюри ўртасидаги жанг келаси йилнинг март ойида Саудия Арабистонида бўлиб ўтиши мумкин. Бу ҳақда таниқли журналист Майк Коппингер ижтимоий тармоқдаги саҳифасида хабар берди.

Сўнгги жангда Усик британиялик Энтони Жошуа билан тўқнашганди. 12 раунд давом этган жангда украиналик боксчи ҳакамлар қарорига кўра ғалаба қозонганди. Фюри сўнгги жангида ҳамюрти Диллиан Уэйтни мағлуб этди.

Маълумот учун, 34 ёшли Тайсон Фюри профбоксда умумий 32 та жанг ўтказиб, жангларнинг ҳеч бирида мағлубиятга учрамаган. Британиялик боксчи 32 та жангнинг 23 тасини нокаут билан тугатган. Усик ҳам ўтказган 20 та жангининг барчасида зафар қучган.

Эслатиб ўтамиз, жорий йилнинг 3 декабрь куни Фюри Лондондаги “Tottenham Hotspur” стадионида яна бир англиялик боксчи Дерек Чисорага қарши учинчи марта рингга кўтарилади.

Шахзод Шукуров