Украинанинг НАТОга аъзо бўлиши 3-жаҳон урушига олиб келади – Орбан

Венгрия Бош вазири Виктор Орбан Украинанинг НАТОга аъзо бўлиши Россия билан қуролли тўқнашувга ва эртаси куни Учинчи жаҳон урушига олиб келишини айтди. Бу ҳақда у ўзининг Х ижтимоий тармоғидаги саҳифасида ёзди.

“Украина НАТОда? Бу Россия билан уруш дегани ва эртаси куни Учинчи жаҳон уруши бошланади”, деб ёзди сиёсатчи.

Украинанинг Европа Иттифоқига аъзо бўлиш эҳтимолига тўхталар экан, Орбан бундай ривожланиш “фронт чизиғини Европанинг юрагига олиб келишини” таъкидлаган.

“Бу дипломатия эмас, бу – тентаклик. Порох тўла бочкага гугурт ташлаб бўлмайди. Биз уларга Европани жанг майдонига айлантиришга йўл қўймаймиз”, дейди Венгрия Бош вазири.

Эслатиб ўтамиз, Орбан аввалроқ НАТО ва Европа Иттифоқининг Украинани бу ташкилотларга қабул қилиш борасидаги позициясида катта бурилиш юз берганини айтган, бу борадаги қарашларини энди ҳатто Полша ҳам ўзгартирганини таъкидлаган эди.