Украинада Россия зарбасига учрамаган электростанция қолмади – Шмигаль

Украинада уруш бошланганидан бери Россия армияси зарбасига учрамаган бирорта ҳам электростанция қолмади. Бу ҳақда мамлакат Энергетика вазири Денис Шмигаль Олий Рада мажлисидаги чиқишида маълум қилди. 

Унинг сўзларига кўра, ўтган йил давомида Россия энергетика инфратузилмасига қарши 612 та аниқ йўналтирилган ҳужум амалга оширган. Ҳозирда ҳужумлар интенсивлиги янада ортиб бормоқда, зарбалар деярли ҳар куни берилмоқда. Оқибатда минглаб мегаватт электр энергияси ишлаб чиқариш қувватлари ишдан чиққан.

Шу билан бирга, вазирнинг айтишича, мамлакат энергетика тизими ҳануз яхлит ҳолда сақланиб қолган, бироқ электр энергияси истеъмолига жиддий чекловлар жорий этилган. Энг мураккаб вазият Киевда, шунингдек Одесса, Днепропетровск, Харьков вилоятларида ва фронтга яқин ҳудудларда кузатилмоқда.

Шмигаль халқаро ҳамкорлар билан генераторлар, аккумуляторлар, трансформаторлар ва таъмирлаш учун зарур бўлган бошқа ускуналарни харид қилиш бўйича фаол ишлар олиб борилаётганини айтган. Энергетика объектларини тиклашга 15 мингдан ортиқ мутахассис жалб қилинган бўлиб, улар тун-у кун ишламоқда. Бундан ташқари, Украина Европа Иттифоқидан электр энергияси импортини оширмоқда. 

“Россия бизни энергетик террор орқали синдиришга умид қилмоқда. Биз таҳдидлар жиддийлигини тўлиқ англаймиз ва уларга тез ҳамда самарали тарзда жавоб бермоқдамиз”, дейди вазир.

Маълумот учун, ўтган ҳафта Киевда Россиянинг кенг кўламли ҳужумларидан сўнг қарийб 6 мингта уй иссиқлик ва электр таъминотисиз қолган, бу пойтахтдаги кўп қаватли турар жойларнинг деярли ярмига тенг. Жорий йил 13 январь кечасидаги зарбалардан кейин шаҳарда электр энергияси танқислиги янада кучайган, Киев мэри Виталий Кличко ҳатто муҳим инфратузилма объектларини таъминлаш учун ҳам электр етишмаганини маълум қилган. 15 январь оқшомига келиб, Киевда тахминан 300 та уй ҳали ҳам электрсиз қолган.

Европа Иттифоқининг сўнгги баҳоларига кўра, агар Россия ҳужумлари ҳозирги кўламда давом этса, урушдан аввал тахминан 15 миллион киши яшаган Украинанинг бутун шарқий минтақалари электр таъминотидан бутунлай узилиб қолиши мумкин. Бунгача Украина энергетика компаниялари шикастланган станцияларни таъмирлаш учун зарур ускуна деярли қолмаганини билдирган.