Украина урушда ғалаба қозонади, деб ўйламайман – Трамп

АҚШ Президенти Дональд Трамп Россия билан бўлаётган урушда Украина ғалаба қозонишига ишонмаслигини билдирди, бироқ бу назарий жиҳатдан мумкинлигини таъкидлади. Трамп бу баёнотни кеча, 20 октябрь куни Австралия Бош вазири Энтони Альбанезе билан биргаликдаги чиқиши вақтида билдирди.

“Улар ҳали ҳам ютуши мумкин. Мен улар ғалаба қозонади, деб ўйламайман, лекин назарий жиҳатдан мумкин. Мен ҳеч қачон улар албатта ғалаба қозонади, демаганман, мен улар ғалаба қозониши мумкин, деганман. Ҳар нарса бўлиши мумкин”, дедаг Трамп.

Бир ойча аввал Оқ уй раҳбари Украина Европа Иттифоқи кўмаги билан “курашишга ва ўз ҳудудларини аввалги чегараларида тиклашга қодир” эканини айтган эди. 

“Вақт ўтиши, сабр-тоқат ва Европанинг, айниқса, НАТОнинг молиявий ёрдами билан бу уруш бошланган илк чегараларни тиклаш тўлиқ мумкин”, деган эди АҚШ Президенти ўшанда.

19 октябрь куни АҚШ Президенти Россия–Украина урушига чек қўйиш учун Донбасс минтақаси “бўлиниши” кераклигини айтди, бу ҳолда унинг катта қисми Россия назоратида қолиши лозимлигини қўшимча қилди.

“Ҳаммаси ҳозирги ҳолатда қолсин. У ҳозир ҳам бўлинган. Менимча, минтақанинг 78 фоизи аллақачон Россия томонидан эгаллаб олинган”, деди Трамп.

Унинг қўшимча қилишича, Россия ва Украина “кейинчалик қандайдир келишувга эришиши мумкин”.

Шу куни Трамп “The Financial Times” газетасидаги мақолада келтирилган маълумотни ҳам рад этди. Унда қайд этилишича, АҚШ Президенти Украина етакчиси Владимир Зеленскийни Донецк, Луганск ва Днепропетровск вилоятининг айрим қисмларини ўз ичига олган бутун Донбассни Россияга беришга чақирган, акс ҳолда Россия Президенти Владимир Путин “Украинани йўқ қилади” деб айтгани ҳақида хабар берилган эди.