Украина Путиннинг қароргоҳига ҳужум қилганига ишонмайман – Трамп

АҚШ Президенти Дональд Трамп Украина Россия Президенти Владимир Путиннинг қароргоҳига зарба беришга уринганига ишонмаслигини билдирди. Бу ҳақда у кеча, 4 январь куни Флорида штатидан Вашингтонга учиб кетаётганда самолёт бортида журналистларга маълум қилди.

АҚШ Президентининг сўзларига кўра, Украина томонидан Путиннинг қароргоҳига ҳужум бўлгани ҳақидаги хабарлар ҳақиқатга тўғри келмайди.

“Мен бу ҳужум бўлганига ишонмайман. Қароргоҳ яқинида нимадир содир бўлган, аммо бу билан умуман боғлиқ эмас”, дейди Трамп.

Журналистлар АҚШ Президентига Россия Президенти билан телефон орқали суҳбатдан сўнг у Украинанинг Путиннинг қароргоҳига зарба берганига ишонганини эслатган.

“Чунки ўша пайтда ҳеч ким аниқ билмасди. Мен бу ҳақда биринчи марта эшитгандим. У уйига ҳужум қилинганини айтганди. Биз буни текшириб чиққанимиздан сўнг, бу воқеа бўлмаганига ишонч ҳосил қилдик”, дея жавоб берган Трамп.

Эслатиб ўтамиз, Россия Ташқи ишлар вазири Сергей Лавров Киев 2025 йил 29 декабрга ўтар кечаси Новгород вилоятидаги Россия етакчисининг давлат қароргоҳига дронлар билан ҳужум қилганини айтганди. Хусусан, Россия расмийлари Украинани Новгород вилоятидаги Владимир Путиннинг қароргоҳига 91 та учувчисиз учиш аппарати ёрдамида зарба беришга уринишда айблаган эди.

“The Wall Street Journal” газетаси эса Украина Россия Президентининг қароргоҳига зарба бермаганини ёзди. Нашрга кўра, АҚШ Марказий разведка бошқармаси (МРБ) Украина Қуролли кучлари Путиннинг қароргоҳига бевосита яқин бўлмаган ҳарбий объектга зарба беришга уринганини аниқлаган.

Россия Мудофаа вазирлиги эса 29 декабрь куни уриб туширилган, Путиннинг Новгород вилоятидаги қароргоҳи томон йўналган Украина дронидан парвоз вазифаси ёзилган файл олинганини маълум қилган. Ушбу материаллар Америка томонига топширилгани билдирилган.