Украина инқирози Марказий Осиёга қандай зарар етказди? 

Украинадаги воқеаларнинг Кавказ минтақаси ва Марказий Осиё мамлакатларига салбий таъсири чекланган, бироқ улар учун вазият ноаниқ, келажакда бу ҳолат янада ёмонлашиши мумкин. Бу ҳақда кеча, 7 март куни Халқаро валюта жамғармаси бошқарувчи директори ўринбосари Бо Ли онлайн семинарда маълум қилди.

“Украинадаги можаронинг ушбу мамлакатлар иқтисодиётига салбий таъсири ҳозирча чекланган. Биз Кавказ ва Марказий Осиё минтақаларида ялпи ички маҳсулотнинг 2022 йилга нисбатан 4,7 фоизга ўсишини кутмоқдамиз. Бу икки ой олдин кутганимиздан сезиларли даражада яхши. Икки ой олдин биз тахминан 2,6% кутаётган эдик”, дейди Бо Ли минтақада ялпи ички маҳсулот ўсишининг прогнозлари ҳақида гапирар экан.

Бо Лининг айтишича, бунга Россиядаги пасайиш дастлаб кутилгандек жиддий бўлмагани сабаб бўлган. У минтақа давлатлари Россия билан мустаҳкам иқтисодий алоқаларни сақлаб туришини таъкидлаган.

Халқаро валюта жамғармаси бошқарувчи директори ўринбосарининг сўзларига кўра, Кавказ минтақаси ва Марказий Осиё мамлакатлари учун иқтисодиётни диверсификация қилиш, шунингдек, Россия Федерациясидан “янги муҳожирлар”нинг келиши ва “Россия капиталининг четга чиқиб кетиши” ижобий роль ўйнаган. 

Шу билан бирга, Бо Ли минтақадаги иқтисодий вазиятнинг ёмонлашиш эҳтимоли бор эканини таъкидлаган. Бироқ Украинадаги жанглар, шунингдек, Россияга қарши санкцияларнинг таъсири борасида катта ноаниқлик мавжудлиги минтақадаги иқтисодий вазият қачон ва қай шаклда ёмонлашишига ойдинлик киритишга тўсқинлик қилишини айтган. 

Маълумот учун, Кавказ ва Марказий Осиё минтақаси мамлакатлари қаторига Озарбайжон, Арманистон, Грузия, Қозоғистон, Қирғизистон, Тожикистон, Туркманистон ва Ўзбекистон киради.