Украина АҚШ ёрдами билан ҳам омон қолмаслиги мумкин – Трамп (видео)

north_east

АҚШ Украинани сунъий йўлдош тасвирларидан ҳам маҳрум қилди – ОАВ

АҚШ Президенти Дональд Трамп кеча, 9 март куни “Fox News” телеканалига берган интервьюсида Киевга қурол етказиб беришни тўхтатиш ҳақидаги қарорига изоҳ берди.

Унга кўра, Украина ҳатто Вашингтоннинг ҳарбий ёрдами билан ҳам “омон қолмаслиги” мумкин.

Бундан ташқари, Америка етакчиси Украина Президенти Владимир Зеленскийни АҚШ ёрдами учун “миннатдорчилик”ни ҳис қилмагани учун яна бир бор қоралади.

“У ақлли ва қаттиққўл йигит. У Байден даврида АҚШдан пулни боладан ширинликни тортиб олгандек олди”, деди Трамп.

Шунга қарамай, Оқ уй раҳбари Зеленскийдан Вашингтонга қайтиб, Украинада ноёб тупроқ металлари бўйича битим имзолашини кутаётганини таъкидлади.

Шунингдек, Дональд Трамп Россияга нисбатан ўз позициясини “қаттиқ” деб атади ва бу ҳатто биринчи президентлик даврида ҳам шундай бўлганини таъкидлади. Далил сифатида у Россия ва Германия ўртасида “Шимолий оқим 2” газ қувури қурилишига қарши эканлигини келтирди.

Оқ уй раҳбари Россия ва Хитойни ҳозирда АҚШ мудофаа харажатларини қисқартиришга тўсқинлик қилаётган муаммолар қаторига киритди.

Шу билан бирга, Трамп Россия Президенти Владимир Путин, шунингдек, Хитой ва Шимолий Корея етакчилари билан “яхши муносабатда” эканини таъкидлади.

Американинг NBC телеканали номи ошкор этилмаган манбаларга таяниб хабар беришича, Дональд Трамп ўзини Россия агрессиясидан ҳимоя қилаётган Украинага ҳарбий ёрдамни қайтадан бошлаш учун Владимир Зеленскийдан Россия билан музокаралар жараёнига “муносабат ўзгаришини” кўришни исташини “ўз ёрдамчиларига шахсий равишда тушунтирган”.

NBC манбаларига кўра, гап босиб олинган Украина ҳудудларини Россия Федерациясига ўтказиш контекстида Киевнинг ён бериши ва Украинада сайловлар ўтказилиши эҳтимоли ҳақида бормоқда.