Уиткофф Россия ва Украина ўртасида музокаралар қачон ва қаерда бўлишини маълум қилди

Россия ва Украина ўртасида АҚШ воситачилигида музокаралар жорий йилнинг 10-11-ноябрь кунлари Бирлашган Араб Амирликларининг Абу-Даби шаҳрида бўлиб ўтади. Бу ҳақда АҚШ Президентининг махсус вакили Стив Уиткофф X ижтимоий тармоғида ёзиб қолдирди.

Унинг маълум қилишича, учрашув ишчи даражада ташкил этилади. Ундан олдин АҚШ музокарачилари Брюсселда Франция, Германия, Буюк Британия, Европа Иттифоқи ва НАТО вакиллари билан учрашади. Томонлар Украина учун хавфсизлик кафолатлари ва келажакдаги хавфсизлик архитектурасини муҳокама қилади.

Аввалроқ, ўтган ҳафта Ослода Украина Президенти Владимир Зеленский, Финляндия Президенти Александр Стубб, Норвегия Бош вазири Йонас Гар Стёре ва Стив Уиткофф иштирокида учрашув бўлиб ўтганди.

Шундан бир кун ўтиб, Уиткофф Санкт-Петербургга бориб, Россия Президенти Владимир Путинга Украинадаги можарони ҳал қилиш бўйича ҳужжатларни тақдим этган. Путин эса АҚШ ва Украина иштирокидаги уч томонлама форматда маслаҳатлашувларни қайта бошлашга Москва тайёрлигини билдирган.

Кремль матбуот котиби Дмитрий Песков эса Абу-Дабидаги учрашувда Россия ва Украинанинг хавфсизлик кафолатлари муҳокама қилинишини айтганди.

Эслатиб ўтамиз, аввалроқ Юрий Ушаков Россия, АҚШ ва Украина ўртасида Россия-Украина урушини якунлаш бўйича тинчлик музокаралари жорий йилнинг 4 ноябридан кейин Абу-Дабида ўтказилиши кутилаётганини маълум қилган эди.