UFC жангчисига айланган Рўзибоев промоушен реестридан ўчирилди

Шу йилнинг 12 февраль куни UFC билан шартнома имзолаган Машрабжон Рўзибоев дунёнинг энг кучли лигаси реестридан чиқарилди. Бу ҳақда промоушен матбуот хизмати хабар берди.

Манбага кўра, виза билан боғлиқ муаммо сабаб енгил вазн тоифаси вакили Кауе Фернандес Жаред Гордонга қарши жангда иштирок этолмаган ва унинг ўрнига промоушен матчмейкерлари UFC дебютанти, ўзбекистонлик Машрабжон Рўзибоевга имконият тақдим этган. Аммо жангга уч кун қолганда таклифга рози бўлган аралаш яккакураш устаси тарозида белгиланган вазн меъёрини қила олмаган.  

Қайд этилишича, UFC Машрабжон Рўзибоевга иккинчи имкониятни ҳозирча бермасликка қарор қилди ва уни ташкилот реестридан чиқарди. 

Маълумот ўрнида, 28 ёшли Машрабжон Рўзибоев Нурсултон Рўзибоевнинг укаси ҳисобланади. 2019 йилда у “Naiza” промоушенида 1 та, 2021 йилда “Octagon” лигасида ҳам 1 та жанг ўтказди. Айни пайтда у 7 та ғалабали серия билан келмоқда.