ЎФА футболчиларни огоҳлантирди

Жорий йил 15 мартдан бошлаб Ўзбекистондаги расмий футбол мусобақалари давомида футболчиларнинг экипировкасига оид талаблар футбол ўйинлари қоидалари асосида қатъий назорат қилинади. Бу ҳақда Ўзбекистон футбол ассоциацияси огоҳлантириш эълон қилди

Қайд этилишича, эндиликда футболчиларнинг мажбурий экипировкалари гетрага (пайпоқ) ташқи томондан ёпиштирилган ёки унга ўралган лента ёки бошқа материал гетранинг ўша қисми ранги билан бир хил бўлиши керак.

Шиткалар (махсус ҳимоя воситаси) — улар махсус материалдан тайёрланган бўлиши, етарли ҳимоя таъминлайдиган ўлчамда бўлиши ва гетра билан тўлиқ ёпилган бўлиши лозим.

Шунингдек, шортикнинг тагидан кийиладиган кийим шортикнинг асосий ранги ёки қуйи қисми ранги билан бир хил бўлиши керак ва битта жамоа ўйинчилари бир хил рангдан фойдаланишлари зарур.

Шу муносабат билан жамоалардан футболчиларнинг майдонга чиқишдан олдин экипировкалари белгиланган талабларга тўлиқ мос бўлиши таъминлаши зарур.

Қоидаларга зид ҳолатлар аниқланган тақдирда футболчи камчилик бартараф этилмагунча ўйинга қўйилмаслиги, зарур ҳолларда эса майдонга туширилмаслиги мумкин.

Маълумот учун, ушбу ҳолат бўйича қатъий чора кўриш жорий йилнинг 15 март куни бўлиб ўтадиган Суперкубок баҳсидан бошлаб амалга оширилади.