Туркияда ўзбекистонлик аёл жинсий зўравонликка учради

Жорий йилнинг 5 март куни Туркиянинг Истанбул шаҳрида ўзбекистонлик аёл озарбайжонлик шахс тарафидан жинсий зўравонликка учради. Бу ҳақда “Halktv” хабар қилди.

Қайд этилишича, ҳодиса Кадикўй туманидаги Думлупинар маҳалласида маҳаллий вақт билан соат 04:33 атрофида содир бўлган. Уч нафар озарбайжонлик шахс Турал А., Фузули А. ва Ширали И. олдиндан кузатиб юрган кўп қаватли уйга ўғирлик қилиш учун кирган.

Турал А. ва Фузули А. 68 ёшли Наримон Фиген П. исмли аёл яшайдиган хонадонининг иккинчи қават балконига нарвон ёрдамида кирган. Ширали И. эса шериклари уйга кирганидан сўнг нарвонни олиб, воқеа жойидан узоқлашган.

Ширали И. Турал А. ва Фузули А. воқеадан 10 кун олдин Истанбулнинг Ғозиусмонпошшо туманида бўёқчи бўлиб ишлайдиган Атиқ С. исмли озарбайжонлик эркакнинг уйига борган. “Борадиган жойимиз йўқ, иш қидиряпмиз”, деган икки танишига Атиқ С. уйининг кўмир омборида вақтинча яшашга рухсат берган.

Атиқ С.нинг айтишича, 5 март куни кечқурун улар ундан нарвон ва отвёртка сўраган. У нима учун кераклигини сўраганида, Фузули А. “бизнинг озарбайжонлик бир опамиз бор. Қаровчилик қиларди, лекин маошини бермай қўйишган. Бориб пулини олиб келамиз”, дея жавоб берган.

Атиқ С.нинг айтишича, улар таҳдид қилгани учун нарвон ва асбобларни беришга мажбур бўлган.

Шундан сўнг кечаси уч нафар гумонланувчи уйидан таксига ўтириб, Кадикўйга борган. Бир неча кўча нарида тушиб, пиёда кўп қаватли уй томон йўл олган. Улар кирган хонадон 68 ёшли Наримон Фиген П.гa тегишли бўлиб, аёл уйда ўзбекистонлик қаровчиси билан яшаган.

Аниқланишича, у ерда олдинроқ Жайҳуна О. исмли озарбайжонлик аёл ишлаган, аммо у кетгач унинг ўрнига Ўзбекистон фуқароси M.K. иш бошлаган. Воқеа содир бўлган куни уйда фақат Наримон Фиген ва М.К. бўлган.

Эркаклардан икки нафари балкон эшигининг қулфланмаганидан фойдаланиб ичкарига кирган. Наримон Фиген П. ўз хонасида ухлаб ётган пайтда Турал А. уни уйғотган ва сейфнинг жойини сўраган.

“Бизнинг сиз билан ишимиз йўқ. Ўғлингизга тегишли бир ҳужжат бор, уни сейфдан оламан”, деган Турал А.

Аёл эса уйда сейф йўқлигини айтган. Шунга қарамай, Турал А. хонани қидириб, каравот остида яширилган сейфни топган. Қўрқиб кетган аёл калитни беришга мажбур бўлган. Сейфдан улар 10 жуфт сирға, 3 та занжир, 6 та билагузук, 10 та олтин танга, 10 минг турк лирасини олган. Бундан ташқари, аёлнинг қўлидаги 9 та билагузук, бармоғидаги олтин узук ва қулоғидаги сирғаларни ҳам ечиб олган.

Ўзбекистонлик қаровчига тажовуз

Фузули А. уйга кираётган пайтда йўлакда ўзбекистонлик қаровчи M.K. билан тўқнаш келган. Бир фарзанднинг онаси M.K. 2026 йил 11 февралда Туркияга борган ва аввалги қаровчининг ўрнига иш бошлаган бўлган.

Унинг сўзларига кўра, Фузули А. унга пичоқ ўқталиб, қўрқитган. Қўллари ва оғзини боғлаб, жинсий зўравонлик қилган.

“Мен ва уй эгаси алоҳида хоналарда ухлаётгандик. Ташқаридан шовқин эшитдим. Йўлакка чиққанимда икки эркак балкон орқали уйга кираётганини кўрдим. Улардан бири мени ушлаб олди. У узун пичоққа ўхшаш қурол кўрсатиб, қўрқитди. Қўлларимни ва оғзимни боғлади. Кейин мени ётоқхонамга олиб кириб, ётоққа ётқизди ва жинсий зўравонлик қилди. Шу пайтда “Агар полицияга хабар берсанг сени ўлдираман”, деб таҳдид қилди”, дейди M.K.

Унинг айтишича, воқеа пайтида иккинчи гумондор уй эгасининг олтинларини олаётган бўлган. Кейин улар уй эгасининг заргарлик буюмлари ва пулларини олиб, чиқиб кетган.

Турал А. ва Фузули А. соат 05:06 да уйидан чиқиб кетган ва қайтиш учун метробусга чиққан. Ўша транспортда яна бир озарбайжонлик Ҳалил Н. ҳам бўлган. Ширали И. эса кийимини алмаштириб бошқа метробусга ўтирган. Турал А. шу куннинг ўзидаёқ қўлга олинган.

Полиция маълумотларига кўра, у 2020 йилда Туркияда хитойлик тадбиркорни ўлдиришга уринган ва шу сабабли 5 йил қамалиб чиққан ва мамлакатдан депортация қилинган. Шунга қарамай, у яна Туркияга қайтган. У қўлга олинганда 46 900 турк лираси, қўлида ўғирланган билагузук, бўйнида олтин занжир топилган.

Телефони текширилганда эса Наримон Фиген П.нинг уйининг балкон томондан олинган суратлари аниқланган. Бу суратларни Ҳалил Н. томонидан юборилган бўлган. Кейинчалик маълум бўлишича, бу суратларни унга собиқ қаровчи Жайҳуна О. юборган. У эса 2026 йил 21 февралда Озарбайжонга учиб кетган.

Турал А. сўроқ пайтида берган кўрсатмасида уйга соат 4 да кириб, ўғирлик қилганини айтган.

“Аввал қамоқда бирга бўлган Ҳалил Н. менга уйнинг манзилини ва суратларини берди. Фузули билан бориб уй атрофини кўздан кечирдик. Соат 4 да кириб бордик. Мен кекса бемор аёлнинг хонасига кириб, сейфни сўрадим. У кўрсатди. Сейфдан олтинларни олиб чиқиб кетдик”, деган Турал А.

Фузули А. эса кекса аёлнинг сейфидан 30-40 минг лира олганини билдирган.

“Турал манзилни топиб, уйда олтин ва пул борлигини айтди. Уйни бир неча марта кузатдик. Энаганинг қўлларини боғладим. Сейфни кампирга очдириб олтинларни олиб чиқиб кетдик. 30-40 минг лира атрофида пул олдим”, деган у.

Шунингдек, у ўзбекистонлик аёлни зўрламаганини, фақат ўпганини айтиб ўзини оқлашга уринган.

Жорий йилнинг 8 март куни Фузули А. хорижга қочмоқчи бўлган пайтда самолётда қўлга олинган. Фузули А. ва Турал А. талончилик айби билан қамоққа олинган. Фузули A.га жинсий зўравонлик бўйича ҳам айблов қўйилган. Ширали И. ва Ҳалил Н. эса қидирувга берилган.

Жинсий зўравонлик қурбони бўлган ўзбекистонлик қаровчи M.K. Туркияда бошқа қололмаслигини айтиб, ўзбекистонга қайтганини айтган.

“Мен Туркияда қололмайман, жуда қўрқяпман”, деб Ўзбекистонга қайтган.

Эслатиб ўтамиз, аввалроқ Туркиянинг Баликесир вилоятидан топилган 46 ёшли Дилафрўз Чўлиеванинг жасади Ўзбекистонга қайтарилганди. Мазкур жиноятни содир этишда гумонланиб, 4 нафар шахс қўлга олинган бўлиб, ҳозирги вақтда тергов ҳаракатлари давом этмоқда.

Олдинроқ, Туркиянинг Истанбул шаҳри Шишли туманида чиқинди йиғувчи томонидан ахлат контейнеридан ўзбекистонлик Дурдона Ҳакимованинг жасади топилгани ҳақида хабар берилган эди.
Кейинроқ мазкур иш доирасида у ўлдирилган Умрониядаги уйда яна бир ўзбекистонлик аёл – Сайёра Эргашалиева ҳам бўлаклаб ўлдирилгани аниқланди.