Туркияда қуролли ҳужум оқибатида 8 киши ҳалок бўлди (видео)

Туркиянинг Афёнкарахисар вилоятида бир нечта ҳудудда одамларга қарата ўқ узган эркак 8 кишини ўлдирди, яна бир кишини оғир яралади. Бу ҳақда “Anadolu” хабар берди.

Маълум қилинишича, воқеа кеча, 5 ноябрь куни содир бўлган. Жандармерия ходимлари Айазини қишлоғида уч кишининг, Кийир қишлоғида яна уч кишининг отиб ўлдирилганини аниқлаган. Юкаритандир қишлоғида яраланган ҳолда топилган икки аёл эса шифохонада вафот этган. Яна бир киши оғир жароҳат олган.

Дастлабки суриштирувларга кўра, гумонланувчи йўлда кетаётган автомобилларни тўхтатиб, уларнинг ичидаги одамларга қарата ўқ узган. Ҳалок бўлганларнинг бир-бири билан ҳеч қандай алоқаси бўлмагани аниқланган.

Ҳужумдан кейин Эскишеҳир вилоятига қочган гумонланувчи Сейитгази туманидаги Кирка маҳалласида бир кишининг автомобилини қурол билан тортиб олган. Автомобиль эгаси ва унинг дўсти 112 тезкор ёрдам марказига хабар берган. Уларнинг айтишича, эркак ўзини Туркия Миллий разведка ташкилоти ходими деб таништирган, машинани тинтув қилган ва кейин насoсли милтиқни уларга ўқталган. Йигитлар қуролли таҳдид сабаб автомобиль калитларини беришга мажбур бўлган.

Жандармерия ходимлари гумонланувчи бошқарган SUV русумли автомобилни Тошлиқ маҳалласида лойга ботиб қолган ҳолатда топган. Машина ичидан насoсли милтиқ ва кўплаб патронлар аниқланган. Гумонланувчи эса кўп ўтмай қўлга олинган.

У Одунпазари тумани Жандармерия қўмондонлигида дастлабки тергов ишлари ва тиббий кўрикдан ўтказилгач, Афёнкарахисар вилояти Жандармерия қўмондонлиги ходимларига топширилган.

Эслатиб ўтамиз, аввалроқ Туркиянинг Истанбул шаҳридаги Айюбсултон масжидида ибодат давом этаётган пайтда икки киши ўртасида жанжал чиқиб, жанжал қуролли тўқнашувга айланган эди.