Туркияда 92 ёшли аёлнинг ошқозонидан 35 та данак чиқди

Туркияда шифокорлар кекса аёлнинг ошқозонидан 28 та хурмо уруғи, 35 та зайтун данаги ва бешта тош чиқарди. Бу ҳақда “TRT Haber” хабар берди.

Қайд этилишича, 92 ёшли Шерифе Ай жорий йилнинг 5 февраль куни қорин соҳасидаги кучли оғриқ ва қайт қилиш шикояти билан шифохонага ётқизилган. Тиббий текширув натижалари шифокорларни ҳайратга солган: унинг ошқозони ва ичакларида 28 та хурмо уруғи, 35 та зайтун данаги ва муштдек катталикдаги бешта тош топилган.

Аёлнинг ингичка ичагида 4 см ҳажмдаги тош тиқилиб қолган ва ичакнинг ёрилишига ҳамда тўқималарнинг шикастланишига сабаб бўлган. Агар ўз вақтида жарроҳлик амалиёти ўтказилмаганида, бу ҳолат аёл учун ҳалокатли бўлиши мумкин эди. Шифокорлар икки соат давом этган операция орқали ичакнинг зарарланган қисмларини ва барча бегона жисмларни олиб ташлаган. Операциядан сўнг пенсионер беш кун реанимацияда бўлиб, соғлиғини тиклаган.

Аёлнинг сўзларига кўра, у хурмо ва зайтун меваларини жуда яхши кўргани учун ҳар доим данакларини ҳам ютиб юборган. Шифокорлар айрим ҳолларда бундай ўсимта шаклидаги ҳосилаларни йўқ қилиш учун газланган ичимликлар ишлатилишини таъкидлаган. Уларнинг таркибидаги кислоталилик ва карбонат ангидрид баъзи турдаги массаларни эритишда ёрдам беради. Бироқ бу усул фақат 23-60 фоиз ҳолатларда самарали бўлиб, жарроҳлик амалиётидан аввал дастлабки муолажа сифатида қўлланилади.

Эслатиб ўтамиз, аввалроқ фарғоналик 2 ёшли қизнинг қорнидан 135 та магнит шарча олинган эди. Қизалоқ магнит шарчалар билан ўйнаб келган ва шу жараёнда улардан анча-мунчасини ичига ютган. Вақт ўтиши билан шарчалар қорнида йиғилиб қолган ва унинг ҳаётига жиддий хавф солган. Шифокорлар жарроҳлик амалиёти ўтказиб, қизалоқ қорнидаги 135 та магнит шарчани олиб ташлаган.