Туркия Сочи музокаралари ҳақида БМТга ахборот беради

Туркия яқин кунларда Президент Ражаб Тойиб Эрдўған ва Россия етакчиси Владимир Путин ўртасида Сочида бўлиб ўтган музокара натижалари ҳақида БМТга ахборот беради. Бу ҳақда маҳаллий дипломатик манбага таяниб, ТАСС хабар берди.

“Келгуси кунларда Туркиянинг БМТ билан ғалла коридорини қайта тиклаш бўйича биргаликда тайёрланган таклифлар пакети бўйича алоқаларини кутишимиз керак. Бу, албатта, Туркия ва Россия етакчилари ўртасидаги ташаббусларнинг табиати ва уларни муҳокама қилиш даражасини ҳисобга олган ҳолда, юқори даражадаги мулоқотлар бўлади”, деган агентлик суҳбатдоши.

Шунингдек, у Сочидаги ғалла келишувини қайта тиклашга қаратилган музокараларга Анқара ўзини тийган оптимизм билан ёндашганини қўшимча қилган.

“Россия ўз шартлари бажарилмагунча келишувга қайтишдан маъно кўрмайди. Туркия эса, бир томондан, глобал озиқ-овқат инқирозини енгиб чиқишга қаратилган, бошқа томондан Украинадаги можарони ҳал қилиш учун зарур шарт-шароит яратадиган ташаббусни қўлдан бой бермоқчи эмас”, дейди манба.

Шу билан бирга, унинг фикрича, ғалла бўйича келишувни қайта тиклаш борасидаги тараққиёт асосан Ғарбга боғлиқ бўлади.

“Ғарб давлатлари Россияга қарши изоляция ва эмбарго масаласи бўйича ўз позицияларини қайта кўриб чиқишлари, БМТ эса уларни бунга ишонтириш учун янада қатъий қадамлар ташлаши керак. Бу ерда масала Брюсселда кўрилаётганидек, Россия бурчагидан кенгроқдир. Бу Украинанинг Қора денгиздаги вақтинчалик йўлаклардан фойдаланиш режаларини ҳисобга олган ҳолда НАТО мамлакатлари кўмагида Қора денгиз ҳавзаси учун минимал хавфсизлик масаласидир”, деган дипломатик доиралар вакили.

Эслатиб ўтамиз, кеча, 4 сентябрь куни Сочида Путин билан музокаралардан сўнг ўтказилган матбуот анжуманида сўзлаган Эрдўған Анқара Қора денгиз ғалла ташаббусини қайта бошлаш учун янги ташаббуслар тўпламини тайёрлагани ва унинг ижобий кўриб чиқилишига умид қилганини айтганди. Ўз навбатида, Россия Президенти Москва Истанбул келишувлари бўйича унга берилган ваъдалар бажарилган кундан бошлаб бир неча кун ичида ғалла битимига қайтишга тайёрлигини билдирган.