Туркия Эрон билан авиация ва банк алоқаларини узишни бошлади

АҚШ томонидан Эрон авиация соҳасига қарши жорий этилган санкциялар Туркияни Эронга ўз рейсларини бекор қилишга ва унинг авиакомпанияларидан бирининг парвозларини тақиқлашга мажбур этди. Бундан ташқари, Эрон билан ҳамкорлик қилаётган банклар ҳам зарба остида қолди. Бу ҳақда “Middle East Eye” нашри хабар берди.

Қайд этилишича, Туркиянинг Turkish Airlines миллий авиаташувчиси, шунингдек, Pegasus ва AJet авиакомпаниялари АҚШ санкциялари кучга кирган 21 сентябрдан эътиборан Эронга барча рейсларни бекор қилган. Дастлабки икки компания сайтларида 2027 йилнинг мартигача Эронга рейслар умуман қолмаган, Pegasus эса ўз брон қилиш тизимидан бу каби барча рейсларни ўчириб ташлаган. 

“Turkish Airlines ҳатто ярим йилдан кейин ҳам парвозларни қайта тиклашига ҳеч қандай кафолат йўқ”, дейди компания вакили “Iran International”га. 

Шунингдек, “Middle East Eye” нашрининг ёзишича, Туркия АҚШ томонидан Эроннинг Mahan Air тижорат авиакомпаниясига хизмат кўрсатган турк компанияларига қарши санкциялар жорий этилгач, унга ўз ҳудудига учишни тақиқлаган. 

Mahan Air 2011 йилдаёқ АҚШнинг “қора рўйхати”да бўлган, 8 сентябрь куни эса АҚШ мамлакатни “қурол-аслаҳа, ҳарбийлар ва ноқонуний юкларни” ташиш имкониятидан маҳрум қилиш мақсадида Эроннинг барча 27 та авиакомпаниясига қарши санкция киритган.

Бундан ташқари, чеклов чоралари остига эронликларга хизмат кўрсатган воситачи ва сохта фирмалар, шунингдек, бошқа мамлакатлар, жумладан БАА ва Туркия компаниялари тушган. 

“Бу қолган Эрон авиакомпаниялари билан бизнес юритаётганлар учун огоҳлантириш бўлсин: сиз глобал молиявий тизимдан узилиб қолиш хавфи остидасиз”, дейди АҚШ Молия вазири Скотт Бессент.

Ҳозирча Туркия бошқа Эрон авиакомпанияларининг парвозларига тақиқ қўйгани йўқ. Аммо ўтган дам олиш кунлари у мамлакатда бир неча ўн йиллардан бери фаолият юритиб келаётган Эроннинг Bank Mellat банкидан лицензиясини қайтариб олган. Шунингдек, банк регулятори Golden Global Investment Bank’ни ўз назоратига олган. Ушбу банк 2019 йилда ислом қоидалари бўйича ишлайдиган, яъни фоизсиз хизматлар кўрсатувчи биринчи турк инвестиция банкига айланган.

АҚШ ҳозирда Golden Global Investment Bank’га қарши Эрон ҳукумати фойдасига молиявий операцияларни амалга оширгани учун санкциялар киритган.

Эслатиб ўтамиз, аввалроқ АҚШнинг иқтисодий қамали кучайтирилиши фонида Теҳрон Вашингтон томонидан ҳарбий босим юмшатилган ва қамал олиб ташланган тақдирда Ҳормуз бўғозида кемалар қатновига қайта рухсат беришга тайёрлигини маълум қилганди.