Тўқаев Путинсиз бирор муаммони ҳал қилиб бўлмаслигини айтди

Россия Президенти Владимир Путин глобал кун тартибини шакллантирадиган лидердир. Бу ҳақда Қозоғистон Президенти Қосим-Жомарт Тўқаев “Egemen Qazaqstan” газетасига берган интервьюсида айтиб ўтди.

Тўқаев Россия БМТ Хавфсизлик Кенгашининг доимий аъзоси сифатида жаҳон сиёсатида жуда муҳим роль ўйнашини ҳам алоҳида урғулаган. 

“Россия Президенти Владимир Путин ўзининг сўзлари ва ҳаракатлари билан моҳиятан глобал кун тартибини шакллантирадиган лидердир. Россиянинг фикри бутун дунёда инобатга олинади, бу давлат иштирокисиз биронта ҳам жаҳон муаммосини ҳал қилиб бўлмайди ва бу ҳақиқат. Шундай экан, Россиядек давлатда президентлик сайловлари катта халқаро аҳамиятга эга бўлади ва дунёнинг аксарият давлатларининг эътиборини тортади”, дейди Тўқаев.

Унинг қайд этишича, Россияда 2024 йилнинг март ойида бўлиб ўтадиган президентлик сайловлари Остона ва Москва ўртасидаги муносабатларнинг юқори даражаси туфайли Қозоғистонда алоҳида қизиқиш уйғотмоқда. 

“Россиядан ташқари АҚШ, Озарбайжон, Буюк Британия, Ҳиндистон ва бошқа мамлакатларда ҳам сайлов кампаниялари ўтказилади, Европа парламентига ҳам сайловлар бўлиб ўтади. Албатта, биз бу сайлов жараёнларини диққат билан кузатиб борамиз. Россиядаги президентлик сайловлари, албатта, Остона ва Москва ўртасидаги муносабатларнинг юқори даражаси туфайли биз учун алоҳида қизиқиш уйғотади”, дейди у.

Давлат раҳбари Россия Қозоғистоннинг асосий стратегик ҳамкори ва иттифоқчиси эканини эслатган.

“Ўтган 30 йил ичида биз 300 дан ортиқ шартнома ва битимларни ўз ичига олган давлатлараро муносабатларнинг таъсирчан архитектурасини қурдик. Икки томонлама ҳамкорлик механизмлари деярли барча соҳаларда ишламоқда. Олий даражадаги сиёсий мулоқот жадал ривожланмоқда. Биз кўп томонлама тузилмалар доирасида, шунингдек, минтақавий барқарорлик ва халқаро хавфсизликни таъминлаш масалаларида ҳамкорлик қиламиз”, дейди Тўқайев. 

Унинг сўзларига кўра, ўтган йилги кенг кўламли икки томонлама кун тартибидаги муҳим воқеалардан бири Путиннинг Қозоғистонга расмий ташрифи бўлган.  

“Музокаралар давомида биз давлатларимиз ўртасидаги стратегик шериклик ўзгармас дўстона характерини тасдиқладик. Россия Қозоғистоннинг асосий савдо-иқтисодий шерикларидан биридир. 2023 йилнинг 10 ойида икки давлат ўртасидаги товар айирбошлаш ҳажми 21,4 миллиард долларни ташкил этди. Бунинг ажабланарли жойи йўқ, чунки орамизда дунёдаги энг узун қуруқлик чегараси мавжуд”, дейди Қозоғистон раҳбари. 

Тўқаев, шунингдек, анъанавий тарзда маданий-гуманитар, илмий-маърифий алоқаларни кенгайтиришга алоҳида эътибор қаратилаётганини билдирган.  

“Дарвоқе, бу йил буюк рус шоири Александр Пушкин таваллудининг 225 йиллиги нишонланади. Бу юбилей нафақат Россия, балки Қозоғистон учун ҳам катта аҳамиятга эга. Чунки Пушкин ҳам буюк Абайимиз сингари икки халқ ўртасидаги дўстлик ва маданий алоқаларнинг асосий тимсолларидан биридир”, дейди Қозоғистон раҳбари.