Тўқаев Блинкен билан учрашди

Қозоғистон Президенти Қосим-Жомарт Тўқаев бугун, 28 февраль куни Остонада АҚШ Давлат котиби Энтони Блинкен билан учрашди. Учрашув чоғида республика АҚШ билан стратегик ҳамкорликни ривожлантиришга тайёр эканини айтди. Бу ҳақда Қозоғистон раҳбари матбуот хизмати хабар берди.

“Сизнинг ташрифингиз стратегик ҳамкорлигимизни ривожлантиришга қўшимча туртки бериш нуқтаи назаридан айниқса муҳимдир. Хавфсизлик, энергетика, савдо ва сармоя каби стратегик муҳим соҳаларда жуда яхши ва ишончли узоқ муддатли шериклик мавжуд. Шу боис, биз бундан кейин ҳам ҳамкорлик қилишга тайёрмиз. Фурсатдан фойдаланиб, Америка Қўшма Штатларининг мустақиллигимиз, ҳудудий яхлитлигимиз ва суверенитетимиз учун доимий ва кучли қўллаб-қувватлаётгани учун миннатдорчилигимизни билдирмоқчиман”, деган Қозоғистон раҳбари.

Шунингдек, Тўқаев Қўшма Штатлар Қозоғистондаги энг йирик сармоядорлардан бири бўлиб, ҳазирда мамлакатга жами 62 миллиард доллардан ортиқ АҚШ сармояси киритилганини қайд этган. Бундан ташқари, у АҚШнинг C5+1 форматида ҳамкорликни кенгайтиришга қаратилган саъй-ҳаракатларини олқишлаб, Остона шаҳрида Марказий Осиё мамлакатлари ва АҚШ ташқи сиёсат идоралари раҳбарларининг учрашувларини ўтказиш муҳимлигини айтган.

Ўз навбатида, АҚШ Давлат котиби Тўқаевга меҳмондўстлиги учун миннатдорлик билдирган ва унга АҚШ Президентининг саломини етказган. Шунингдек, Қўшма Штатлар дипломатияси раҳбари Қозоғистондаги сиёсий ва иқтисодий ўзгаришларни юқори баҳолашини айтган. 

“Бизнинг муносабатларимиз мустаҳкам ва у янада яхшиланади. Биз бу йўналишга содиқмиз. Шу билан бирга, бугун Остонада марказий осиёлик шерикларни бир жойга тўплаганингиз учун сиз ва жамоангиздан миннатдормиз. Умид қиламанки, биз ҳамкасбларимиз билан бирга минтақани бирлаштириш, мустаҳкам алоқаларни яратиш, яқинроқ ҳамкорлик қилиш, амалий ишларга эътибор қаратиш бўйича янада аниқ ишларда иштирок этамиз”, деган Блинкен Тўқаев билан учрашувда. 

Эслатиб ўтамиз, АҚШ Давлат котиби Остонадаги учрашувлардан сўнг, Ўзбекистонга келиши ва Президент Мирзиёев билан кўришиши режалаштирилган.

Алибек Бейжанов