Трампнинг ишонганлари Эрон бўйича махфий йиғилиш ўтказди – “Axios”

АҚШ Президенти Дональд Трамп маъмуриятининг юқори лавозимли вакиллари Кэмп-Дэвиддаги Президент қароргоҳида Эрон ва Ямандаги ҳусийларга қарши кейинги қадамларни муҳокама қилиш учун махфий йиғилиш ўтказди. Бу ҳақда уч нафар америкалик амалдорга таяниб, “Axios” хабар берди.

Маълумотларга кўра, йиғилишга АҚШ вице-президенти Жей Ди Вэнс бошчилик қилган. Унда Давлат котиби Марко Рубио, Мудофаа вазири Пит Хегсет, Президентнинг махсус вакили Стив Уиткофф, Марказий разведка бошқармаси директори Жон Рэтклифф ва Штаб бошлиқлари бирлашган қўмитаси раиси генерал Дэн Кейн иштирок этган.

Қайд этилишича, АҚШ юқори мартабали амалдорларининг бундай учрашуви охирги марта 2025 йил июнь ойида бўлиб ўтган. Ўша учрашувдан бир неча кун ўтиб Исроил Эронга ҳужум қилган.

Нашрга кўра, бу йиғилиш АҚШ ва Эрон ўртасидаги кескинлик кучайиб бораётган бир пайтда ўтказилган. Трамп жорий йилнинг 1 октябрь куни Эрон бўйича қарор қабул қилиши кераклигини айтиб, “Эрон келишувга имзо чекиши ёки мавжуд бўлишдан тўхташи керак”, деган. Кеча, 2 октябрь куни ундан Эронга нисбатан кейинги қадами қандай бўлиши сўралганида:

“Агар сизга айтсам, бу жуда катта янгилик бўларди. Аммо барчасини ўзингиз кўрасиз. Ҳаммаси жуда яхши кетмоқда. Эроннинг ишлари ёмон”, деган АҚШ Президенти.

Шунингдек, Оқ уй раҳбаридан Саудия Арабистонининг Ямандаги ҳусийларга қарши режалаштирилаётган ҳарбий амалиётини қўллаб-қувватлаш сўралмоқда. Саудия томони Трампдан ҳусийларга қарши ҳаво ҳужумларини маъқуллашни истамоқда. Бироқ америкалик амалдорларнинг айтишича, Трамп ҳозирча бунга рози бўлишга мойил эмас, аммо кейинчалик қарорини ўзгартириши мумкин.

Эслатиб ўтамиз, аввалроқ Эрон АҚШга юборган Форс кўрфазидаги сулҳни қайта тиклаш бўйича сўнгги таклифига Вашингтондан жавоб олганини маълум қилганди.