Трампнинг гольф клубида ўқ узилди

Республикачилар партиясидан президентликка номзод Дональд Трампга “яқин масофада” ўқ отилди. Бу ҳақда унинг сайловолди штаб-квартираси кеча, 15 сентябрь куни ижтимоий тармоқдаги саҳифасида маълум қилди.

Америка Қўшма Штатларининг собиқ президенти хавфсиз экани хабар қилинмоқда.

Трампнинг ўғли, кичик Дональд Трамп ўзининг Х аккаунтида воқеа содир бўлган жой яқинидаги буталар орасидан АК-47 автомати топилганини даъво қилмоқда.

“Гумонланувчи ҳибсга олингани хабар қилинмоқда”, дея қўшимча қилди кичик Трамп.

“New York Post” газетасининг хавфсизлик манбаларига таяниб ёзишича, ўқ фақат АҚШ махфий хизмати агенти томонидан отилган. Гумонланувчи ҳибсга олинган, бироқ унинг сабаблари ҳақида ҳеч нарса маълум эмас.

“Reuters” агентлиги икки манбага таяниб хабар беришича, Палм-Бичдаги (Флорида штати) Трампга тегишли гольф майдончаси яқинида бир неча марта ўқ узилган. Бундан олдин “New York Post” икки киши собиқ президентга қаратилмаган отишма бошлагани ҳақида хабар берган эди.

АҚШ Махфий хизмати матбуот котиби Энтони Гуглиелми ўзининг Х аккаунтида агентлик воқеани Палм-Бич округи шерифи билан ҳамкорликда тергов қилаётганини ёзди. Шунингдек, у Махфий хизмат ва маҳаллий шериф идораси тез орада қўшма матбуот брифингини ўтказишига ваъда берди.

Тахминларга кўра, АҚШ Махфий хизмати ходими Трамп гольф майдонида бўлганида баррикададан милтиқ трубаси чиқиб турганини кўрган ва кейин номаълум одам билан “алоқа ўрнатган”.

Ҳодиса гувоҳининг Палм-Бич округи шерифига маълум қилишича, у гумондорнинг буталар орасидан югуриб чиқиб, қора Nissan машинасига ўтирганини кўрган. Воқеа гувоҳи машина ва давлат рақамини суратга олишга муваффақ бўлди. Тез орада эркак қўлга олинди, яширинган жойидан АК-47 автомати ва GoPro камераси топилди. АҚШ Федерал қидирув бюроси бу воқеа собиқ президентга навбатдаги суиқасд бўлиши мумкинлигини истисно этмади.

Оқ уйнинг билдиришича, АҚШ Президенти Жо Байден ва вице-президент Камола Ҳаррис воқеадан хабардор бўлган ва “у (Трамп) хавфсиз эканини билиб, енгиллашган”.

“Америкада зўравонликка ўрин йўқ”, деган Демократик партиядан давлат раҳбари лавозимига номзод Ҳаррис.

АҚШ Президенти Жо Байден Трамп билан содир бўлган воқеадан сўнг Қўшма Штатлар махфий хизмати ишини юқори баҳолади.

“Махфий хизмат ва унинг ҳуқуқ-тартибот идораларидаги ҳамкорларининг ҳушёрлиги ва собиқ президент ва унинг атрофидаги одамларнинг хавфсизлигини таъминлашга қаратилган саъй-ҳаракатлари учун мақтайман”, дейди Байден.

Оқ уй раҳбари таъкидлаганидек, у собиқ рақиби сайловолди пойгасида жароҳат олмагани ҳақидаги хабардан хурсанд бўлган.

Америка Қўшма Штатлари вице-президенти лавозимига республикачи номзод Жеймс Дэвид Вэнс Х’да ўзининг партиядоши учун гольф клубидаги ҳодисанинг муваффақиятли якуни ҳақида билиб, хотиржам бўлганини ёзди.

“Президент Трампнинг хавфсиз эканлигидан хурсандман. Бу хабар оммага тарқалгунча мен у билан гаплашдим ва ҳайратланарлиси, унинг кайфияти яхши эди. Биз ҳали билмаган нарсамиз кўп, лекин бугун кечқурун болаларимни янада қаттиқроқ қучоқлайман ва миннатдорлик дуосини ўқийман”, дейди Вэнс.

Маълумот учун, Дональд Трамп 13 июль куни Пенсильвания штатининг Бутлер шаҳрида сайловолди ташвиқоти митингида нутқ сўзлаётганида унга қарата ўқ узилганди. Тўртта ўқ овози эшитилган, шундан сўнг собиқ президент қулоғидан ушлаб, бешинчи ва олтинчи ўт очишдан олдин минбар орқасига яширинишга муваффақ бўлди. Шу пайт қўриқчилар уни ўраб олишди ва яна бир неча ўқ узилди. Кейин қулоғидан қон оқаётган Трампни саҳнадан олиб кетишди. Собиқ президент шифохонага ётқизилган ва у ерда даволанган.

Кейинроқ Трамп ўзининг ижтимоий тармоғида тезкор жавоб учун разведка идораларига миннатдорчилик билдирди.

Федерал қидирув бюроси вакили Трампга ҳужумни 20 ёшли Томас Мэтью Крукс амалга оширган, деб маълум қилди. Матбуот хизмати бошқа тафсилотларни келтирмади. ФҚБ сайловолди ташвиқоти митингидаги отишмани Трампга “суиқасд уюштириш” сифатида расман тан олган.