Трампга суиқасд уюштирилди (видео)

АҚШ пойтахтида жойлашган Washington Hilton меҳмонхонасида Президент Дональд Трамп иштирок этаётган тадбир вақтида қуролли ҳодиса юз берди. Шу сабабли Президент ва тадбир иштирокчилари эвакуация қилинди. Бу ҳақда BNO News хабар берди. 

Воқеа кеча, 25 апрель куни Оқ уй мухбирлари ассоциациясининг анъанавий кечки овқат маросими пайтида содир бўлган. Маълумотларга кўра, номаълум эркак меҳмонхона ичида ўқ узган. Хавфсизлик кучлари банкет залини ўраб олган, у ерда юздан ортиқ одам Трампнинг нутқини кутаётган эди. Гувоҳлар 5–8 маротаба ўқ овози эшитилганини айтган. Ҳужумчи залга кира олмаган, ҳодиса меҳмонхонанинг бошқа қисмида юз берган.

Тадбирда Трампдан ташқари биринчи хоним Мелания Трамп, вице-президент Жей Ди Вэнс, Мудофаа вазири Пит Ҳегсет ва Давлат котиби Марко Рубио ҳам иштирок этган. Уларнинг барчаси, шунингдек журналистлар хавфсиз жойга олиб чиқилган.

Дастлаб ҳодиса оқибатида жабрланганлар ҳақида маълумот берилмаган. Кейинроқ Оқ уй маълумотига кўра, АҚШ Махфий хизмати гумонланувчини қўлга олган.

Трамп Truth Social’даги саҳифасида ҳужумчи қўлга олинганини тасдиқлаб, хавфсизлик хизматлари тезкор ва жасорат билан ҳаракат қилганини таъкидлаган. Унинг айтишича, ҳужумчи бир нечта қурол билан келган ва отишма вақтида Махфий хизмат ходимларидан бирига ўқ теккан, бироқ у бронжилет туфайли омон қолган.

Ҳодиса сабаб журналистлар билан учрашув кейинга қолдирилган.

Эслатиб ўтамиз, аввалроқ АҚШ ҳарбийлари Дональд Трампга қарши суиқасд режасига алоқадор деб ҳисобланган эронлик амалдорни йўқ қилганди.