Трампдан кескин баёнот: Эрон “жуда қаттиқ” зарбага учрайди

АҚШ Президенти Эронга қарши ҳужумлар янада кучайтирилишини маълум қилган. Дональд Трампнинг айтишича, Теҳрон таслим бўлишдан бош тортгани ортидан янги зарбалар режалаштирилмоқда. Бу ҳақда “Politico” ёзди.

Трамп “Truth Social” тармоғидаги баёнотида Эрон “жуда қаттиқ зарба”га учрашини таъкидлаб, аввал нишонга олинмаган объектлар ва гуруҳлар ҳам ҳужумлар рўйхатига қўшилиши мумкинлигини билдирган. Бу баёнот Эрон Президенти Масъуд Пезешкиённинг АҚШ талаб қилган “шартсиз таслим бўлиш”ни рад этганидан кейин янгради.

Пезешкиён давлат телевидениеси орқали қилган чиқишида Теҳрон таслим бўлмаслигини айтган эди. Шу билан бирга, Эрон қўшни давлатларга ҳужум қилмаслигини, агар улар ўз ҳудудидан қарши зарбалар бермаса, бу сиёсат сақланишини эълон қилган.

АҚШ ва Исроил бир ҳафта аввал Эронга қарши кенг кўламли операция бошлаган эди. Ҳужумлар натижасида Ислом Республикасининг олий раҳбари Оятуллоҳ Али Хоманаий ва бир қатор юқори лавозимли амалдорлар ҳалок бўлган. Вашингтон Теҳрондан шартсиз таслим бўлишни талаб қилмоқда.

Айни пайтда можаро энергетика бозорларига ҳам таъсир қилмоқда. Уруш бошланганидан бери нефть нархи кескин ошган, бензин қиймати ҳам кўтарилган. Бу ҳолат, асосан, жаҳон нефтининг қарийб 20 фоизи ўтадиган Ҳормуз бўғозидаги вазият билан боғланмоқда.

АҚШ Давлат департаменти эса минтақадаги америкаликларни эвакуация қилишни давом эттирмоқда. Расмий маълумотларга кўра, сўнгги кунларда ўнлаб махсус рейслар орқали минглаб фуқаролар хавфсиз ҳудудларга олиб чиқилган.

Эслатиб ўтамиз, аввалроқ Трамп Эронда янги раҳбарни танлаш жараёнида Вашингтон ҳам иштирок этиши кераклигини билдирган эди.