Трамп европаликларни Украинадаги урушни молиялашда айблади

АҚШ Президенти Дональд Трамп кеча, 4 сентябрь куни Европа етакчилари билан видеоселектор йиғилиши чоғида уларни Россия нефтини сотиб олиш орқали Украинадаги “урушни молиялаштираётганликда” айблади ва Москвани ушбу даромад манбаидан узиб қўйишга, шунингдек, бу борада Хитойга босим ўтказишга чақирди. Бу ҳақда Оқ уйдаги манбаларига таяниб, бугун, 5 сентябрга ўтар кечаси Американинг “Axios” интернет нашри ва CNN телеканали  хабар берди.

CNN'нинг хабар қилишича, Трампнинг изоҳлари Украинани Россияга қарши мудофаа урушида қўллаб-қувватлашни давом эттириш ниятида бўлган бир қатор Европа давлатлари, шунингдек, Украина Президенти Владимир Зеленский иштирокидаги “кўнгиллилар коалицияси” музокаралари чоғида билдирилган.

“Франция Президенти Эммануэл Макрон ва бошқа Европа етакчилари Трампдан ушбу видеоконференцияга қўшилишни сўрашди”, дейилади хабарда.

“Axios” журналистларининг эслашича, Украинада кенг кўламли уруш бошланганидан кейин Европа давлатлари Россиядан энергия ресурсларини сотиб олишни кескин қисқартирган. Бироқ таҳририятнинг Оқ уйдаги манбасига кўра, “бир йил ичида Россия ёқилғи савдоси учун ЕИдан 1,1 миллиард евро олган”.

Германия канцлери Фридрих Мерц ҳам иштирок этган худди шу видеоконференция ҳақида Германиянинг “Bild” таблоиди хабар берди. Унга кўра, Трампнинг айбловларига жавобан Еврокомиссия раҳбари Урсула фон дер Ляйен уруш бошланганидан сўнг Европа Иттифоқи мамлакатлари томонидан Россия нефтини харид қилиш ҳажми кескин камайганига ишора қилган.

"Ушбу суҳбатда Трампга Россиядан нефтни фақат Венгрия ва Словакия импорт қилиши айтилган. Айни вақтда Трампнинг махсус вакили Стив Уиткофф Европа давлатларини Россия нефтини Ҳиндистон орқали сотиб олишда давом этаётгани учун қоралади", дейилади хабарда.

“Axios” қайд этганидек, Дональд Трамп билан видеоконференциядан сўнг Франция Президенти Эммануэль Макрон агар Россия Президенти Владимир Путин Украина Президенти Владимир Зеленский билан тинчлик музокараларидан қочишда давом этса, АҚШ билан келишилган ҳолда Россияга қарши янги санкциялар жорий этилишини айтди.

“Bild” нашрининг ёзишича, “Трамп суҳбатни Россияга қарши санкцияларга қаратганида, иштирокчилар Америка Президенти билан бу борада биргаликда ҳаракат қилиш борасида келишиб олишга ҳаракат қилган”: 

“Европаликлар 48 соат ичида Вашингтонга ўз вакилларини жўнатиб, Россияга қарши санкциялар бўйича ишчи гуруҳ тузишни таклиф қилган”.

Журналистлар Трампнинг бу таклифга розилиги ёки норозилигини аниқлай олмади.

Владимир Зеленский 4 сентябрь куни ҳам урушга қарши санкцияларни кучайтиришга чақирди.

“Шунингдек, Президент (Доналд Трамп) Европа етакчилари Хитойнинг Россия ҳарбий ҳаракатларини молиялаштиргани учун унга иқтисодий босим ўтказиши кераклигини таъкидлади”, деб ёзади “Axios” ўз манбаларидан иқтибос келтирган ҳолда.

Айни пайтда улар АҚШнинг ўзи ҳам Ҳиндистон каби Россия нефтининг асосий харидори бўлган Хитойга нисбатан ҳали санкциялар киритмаганига эътибор қаратмоқда. “Axios”нинг ёзишича, Европа давлатлари ҳозир тайёрлаётган навбатдаги санкциялар Хитойга ҳам таъсир қилмайди.