Трамп ЕИни “бузиб”, уни ўз йўриғида қайта қурмоқчи – “Politico”

АҚШ Президенти Дональд Трамп Европа Иттифоқини “бузиб”, уни миллий ҳукуматлар Европа институтларига нисбатан каттароқ роль ўйнайдиган тарзда қайта қурмоқчи. Бу ҳақда “Politico” нашри хабар берди.

“Дональд Трамп биринчи президентлик муддати давомида савдо уруши орқали Европа Иттифоқининг зирҳидан ёриқ топишга ҳаракат қилди, бироқ муваффақиятга эриша олмади. Энди эса у янада заиф нуқтани топди – Украинага АҚШ ёрдамининг тўхтатилиши туфайли юзага келган хавфсизлик инқирози, бу эса 27 давлатдан иборат блок ичида ҳалокатли можароларни юзага чиқарди”, дейилади мақолада.

Журналистларнинг таъкидлашича, Трампнинг инаугурациясига фақатгина Италия Бош вазири, ўнг қанот “Италия биродарлари” партияси етакчиси Жоржия Мелони ва Венгрия Бош вазири Виктор Орбан таклиф этилган. Трамп маъмурияти вакиллари Европа институтлари вакиллари билан мулоқот қилишга унчалик хоҳиш билдирмаяпти. Хусусан, АҚШ давлат котиби Марко Рубио ва Европа Иттифоқининг ташқи ишлар ва хавфсизлик сиёсати бўйича Олий вакили Кая Каллас ўртасидаги учрашув Каллас Вашингтонга бориб бўлганидан кейин бекор қилинган.

“Сигнал аниқ. Трамп Европа Иттифоқини четга суриб, миллий етакчилар билан “бўлиб ташла ва ҳукмронлик қил” тамойили асосида сиёсат олиб боришни хоҳламоқда. Бу биринчи президентлик давридаги савдо уруши пайтида имконсиз эди, чунки Европа унга қарши жипслашган эди. Ҳозир эса Украинадаги урушга бўлган турлича ёндашув блокнинг бирлиги борасида ҳаёт-мамот саволларини кун тартибига чиқармоқда”, деб ёзади нашр.

Шу фонда Франция ва Буюк Британия етакчилари Эммануэль Макрон ва Кир Стармер Европа давлатларининг Трампнинг Украинага нисбатан сиёсатига жавоб бериш учун умумий ёндашув топишга ҳаракат қилмоқда. Шу билан бирга, Европа Иттифоқи Трамп Украина атрофида яратган “кучли бўрон”га жавоб бериш учун “жуда бўлинган ва етарли даражада чаққон эмасдек” кўринмоқда.

Шунга қарамай, Европа Иттифоқида Трамп босимига бардош бериш мумкинлигига ишонч бор. Нашрга кўра, европалик дипломат Иттифоқ ҳар доим “зўрға сузиб юрадиган кемага ўхшашини”, лекин ҳар бир инқироздан янада кучлироқ чиқишини тан олган. Экспертлар фикрича, Трамп билан тўқнашувда Европа сиёсатининг оғирлик маркази миллий ҳукуматлар томонга силжиши мумкин. Шунга қарамай, АҚШ баъзи Европа институтлари, хусусан, кенг ваколатларга эга бўлган ва йирик молиявий ресурсларга эга Еврокомиссия билан ҳамкорлик қилишга мажбур бўлади. Нашр тахминига кўра, АҚШ Еврокомиссия билан ҳамкорликни давом эттиради, чунки у Иттифоқнинг савдо сиёсатида етакчи роль ўйнайди.
 
Эслатиб ўтамиз, аввалроқ Эммануэль Макрон, Кир Стармер ва Украина раҳбари Владимир Зеленский тез орада АҚШга расмий ташриф билан боришни режалаштираётгани хабар қилинганди.