Трамп Украинанинг Россияга зарба беришини қўллаб-қувватлади – ОАВ

АҚШ Президенти Дональд Трамп Украина армиясининг Москвага зарба бериш ғоясини қўллаб-қувватлади ва буни амалга ошириш учун зарур бўлган узоқ масофали қуролларни етказиб беришга қарор қилди. Бу ҳақда ўз манбаларига таяниб, “Financial Times” хабар берди.

Нашр манбаларига кўра, Трамп жорий йилнинг 4 июль куни Украина Президенти Владимир Зеленский билан телефон орқали суҳбат чоғида ушбу қарорга келган. 

Қайд этилишича, Трамп Зеленскийдан Москва ҳамда Санкт-Петербургга зарба бера олиши ҳақида сўраган. Зеленский эса бунинг имкони борлиги, фақатгина бу учун АҚШ Украинага керакли миқдорда қурол етказиб бериши кераклиги ҳақида айтган. 

Нашр суҳбатдошларига кўра, Трамп бу ташаббусни қўллаб-қувватлаган, чунки у Россия фақат шундай зарбалардан оғриқ ҳис қилибгина музокара столига ўтиришга мажбур бўлади, деб ҳисоблаган. 

Газетанинг қўшимча қилишича, ўтган ҳафта Римда Украина Президенти Зеленский Пентагон вакиллари ва НАТОдаги воситачилар билан учрашув чоғида улардан “узоқ масофали зарба тизимлари” рўйхатини олган. Бу тизимлар АҚШдан бевосита эмас, балки учинчи давлатлар орқали Украинага етказилиши мумкин. Гап, жумладан, Tomahawk русумли қанотли ракеталар ёки аллақачон Украина Қуролли кучлари тасарруфида бўлган ATACMS ракеталарини Россияга қарши тўлиқ масофада ишлатишга рухсат бериш ҳақида борган.

Оқ уйда журналистлар билан суҳбатда Дональд Трамп Украинага қурол-яроғ етказиб беришни бошлашини айтган, бу харажатларни эса Европа давлатлари қоплашини билдирган. Жумладан, у яқин кунларда Киевга 17 та Patriot зенит-ракета мажмуаси юборилишини режалаштираётганини эълон қилган.

Эслатиб ўтамиз, аввалроқ Трамп Оқ уйда НАТО Бош котиби Марк Рютте билан учрашувда агар яқин 50 кун ичида Украинада тинчлик ўрнатиш бўйича келишувга эришилмаса, АҚШ расмийлари Россиянинг савдо ҳамкорларига 100 фоизлик иккиламчи божлар жорий қилиши ҳақида гапирганди. Россия Президенти матбуот котиби Дмитрий Песков эса АҚШ Президентининг Россиядан олиб кириладиган товарларга 100 фоизлик бож жорий қилиш ҳақидаги таҳдидини “жиддий” деб баҳолади. Песковнинг таъкидлашича, Россия Президенти Владимир Путин бу борада шахсан изоҳ бериши мумкин, аммо ҳозирча унинг позициясини кутиш лозим.